dil ki dhaDkan ab rag-e-jaan ke bahut nazdik hai

dil kī dhaḌkan ab rag-e-jāñ ke bahut nazdīk hai

raat be-āvāz be-andāz be-tahrīk hai

jam ga.ī haiñ tāroñ kī āñkhoñ pe bādal kī taheñ

Duub jaao zaat ke andar falak tārīk hai

kal ke lamhe aaj ke lamhoñ meñ mudġham ho ga.e

dekhnā āñkhoñ meñ ab jalva-numā tahrīk hai

tum mire kamre ke andar jhāñkne aa.e ho kyuuñ

so rahā huuñ chain se huuñ Thiik hai sab Thiik hai

maut kā lamha abhī aayā abhī jaane ko hai

chuum lo miTTī ko apnī hadiya-e-tabrīk hai

dosto āñkheñ na kholo ThanDī sāñseñ mat bharo

aa ga.e manzil pe tum 'aslam' bahut nazdīk hai

dil ki dhaDkan ab rag-e-jaan ke bahut nazdik hai

raat be-awaz be-andaz be-tahrik hai

jam gai hain taron ki aankhon pe baadal ki tahen

Dub jao zat ke andar falak tarik hai

kal ke lamhe aaj ke lamhon mein mudgham ho gae

dekhna aankhon mein ab jalwa-numa tahrik hai

tum mere kamre ke andar jhankne aae ho kyun

so raha hun chain se hun Thik hai sab Thik hai

maut ka lamha abhi aaya abhi jaane ko hai

chum lo miTTi ko apni hadiya-e-tabrik hai

dosto aankhen na kholo ThanDi sansen mat bharo

aa gae manzil pe tum 'aslam' bahut nazdik hai