dil-e-betab ke hamrah safar mein rahna

dil-e-betāb ke hamrāh safar meñ rahnā

ham ne dekhā hī nahīñ chain se ghar meñ rahnā

svāñg bharnā kabhī shāhī kabhī durveshī kā

kisī sūrat se mujhe us kī nazar meñ rahnā

ek hālat pe basar ho nahīñ saktī merī

jāma-e-ḳhāk kabhī ḳhil.at-e-zar meñ rahnā

din meñ hai fikr-e-pas-andāzi-e-sarmāya-e-shab

raat bhar kāvish-e-sāmān-e-sahar meñ rahnā

dil se bhāge to liyā dīda-e-tar ne goyā

aag se bach ke nikalnā to bhañvar meñ rahnā

ahl-e-duniyā bahut ārām se rahte haiñ magar

kab mayassar hai tirī rāhguzar meñ rahnā

vasl kī raat ga.ī hijr kā din bhī guzrā

mujhe vāraftagi-e-hāl-e-digar meñ rahnā

kar chukā hai koī aflāk o zamīñ kī takmīl

phir bhī har aan mujhe arz-e-hunar meñ rahnā

dil-e-betab ke hamrah safar mein rahna

hum ne dekha hi nahin chain se ghar mein rahna

swang bharna kabhi shahi kabhi durweshi ka

kisi surat se mujhe us ki nazar mein rahna

ek haalat pe basar ho nahin sakti meri

jama-e-KHak kabhi KHilat-e-zar mein rahna

din mein hai fikr-e-pas-andazi-e-sarmaya-e-shab

raat bhar kawish-e-saman-e-sahar mein rahna

dil se bhage to liya dida-e-tar ne goya

aag se bach ke nikalna to bhanwar mein rahna

ahl-e-duniya bahut aaram se rahte hain magar

kab mayassar hai teri rahguzar mein rahna

wasl ki raat gai hijr ka din bhi guzra

mujhe waraftagi-e-haal-e-digar mein rahna

kar chuka hai koi aflak o zamin ki takmil

phir bhi har aan mujhe arz-e-hunar mein rahna