dipak-rag hai chahat apni kahe sunaen tumhein

dīpak-rāg hai chāhat apnī kaahe sunā.eñ tumheñ

ham to sulagte hī rahte haiñ kyuuñ sulgā.eñ tumheñ

tark-e-mohabbat tark-e-tamannā kar chukne ke ba.ad

ham pe ye mushkil aan paḌī hai kaise bhulā.eñ tumheñ

dil ke zaḳhm kā rañg to shāyad āñkhoñ meñ bhar aa.e

ruuh ke zaḳhmoñ kī gahrā.ī kaise dikhā.eñ tumheñ

dard hamārī mahrūmī kā tum tab jānoge

jab khāne aa.egī chup kī saa.eñ saa.eñ tumheñ

sannāTā jab tanhā.ī ke zahr meñ bujhtā hai

vo ghaḌiyāñ kyūñkar kaTtī haiñ kaise batā.eñ tumheñ

jin bātoñ ne pyaar tumhārā nafrat meñ badlā

Dar lagtā hai vo bāteñ bhī bhuul na jaa.eñ tumheñ

rañg-birañge giit tumhāre hijr meñ haath aa.e

phir bhī ye kaise chāheñ ki saarī umr na paa.eñ tumheñ

uḌte panchhī Dhalte saa.e jaate pal aur ham

bairan shaam kā dāman thaam ke roz bulā.eñ tumheñ

duur gagan par hañsne vaale nirmal komal chāñd

be-kal man kahtā hai aao haath lagā.eñ tumheñ

paas hamāre aakar tum begāna se kyuuñ ho

chāho to ham phir kuchh duurī par chhoḌ aa.eñ tumheñ

anhonī kī chintā honī kā anyā.e 'nazar'

donoñ bairī haiñ jīvan ke ham samjhā.eñ tumheñ

dipak-rag hai chahat apni kahe sunaen tumhein

hum to sulagte hi rahte hain kyun sulgaen tumhein

tark-e-mohabbat tark-e-tamanna kar chukne ke baad

hum pe ye mushkil aan paDi hai kaise bhulaen tumhein

dil ke zaKHm ka rang to shayad aankhon mein bhar aae

ruh ke zaKHmon ki gahrai kaise dikhaen tumhein

dard hamari mahrumi ka tum tab jaanoge

jab khane aaegi chup ki saen saen tumhein

sannaTa jab tanhai ke zahr mein bujhta hai

wo ghaDiyan kyunkar kaTti hain kaise bataen tumhein

jin baaton ne pyar tumhaara nafrat mein badla

Dar lagta hai wo baaten bhi bhul na jaen tumhein

rang-birange git tumhaare hijr mein hath aae

phir bhi ye kaise chahen ki sari umr na paen tumhein

uDte panchhi Dhalte sae jate pal aur hum

bairan sham ka daman tham ke roz bulaen tumhein

dur gagan par hansne wale nirmal komal chand

be-kal man kahta hai aao hath lagaen tumhein

pas hamare aakar tum begana se kyun ho

chaho to hum phir kuchh duri par chhoD aaen tumhein

anhoni ki chinta honi ka anyae 'nazar'

donon bairi hain jiwan ke hum samjhaen tumhein