dast-e-junun jo band-e-qaba tak pahunch gaya

dast-e-junūñ jo band-e-qabā tak pahuñch gayā

josh-e-bahār husn-e-sabā tak pahuñch gayā

mujh par khulā jo bāb-e-rumūz-e-ḳhud-āgahī

maiñ ḳhud se ho ke zehn-e-ḳhudā tak pahuñch gayā

aayā na zindagī kī haqīqat kā sañg-e-mīl

maiñ sarhad-e-dayār-e-fanā tak pahuñch gayā

us but kī hai atā ki mirā tamtarāq-e-harf

me.arāj-e-hamd-o-mad.h-o-sanā tak pahuñch gayā

ahd-e-bahār meñ asar-e-sohbat-e-jamāl

mere junūñ kī āb-o-havā tak pahuñch gayā

kuchh is tarah se faash huā vo ki aa.ina

har aks rāz-e-husn-o-adā tak pahuñch gayā

kal bazm meñ darāzī-e-shab kī chalī jo baat

maiñ rāz-dāñ thā zulf-e-rasā tak pahuñch gayā

thī aql ham-rikāb so merā junūn-e-shauq

bhar kar zaqand arsh-o-samā tak pahuñch gayā

gūñjī sadā-e-sākit-o-ḳhāmosh har taraf

jab maiñ fareb-e-koh-e-nidā tak pahuñch gayā

'shāriq' ḳhabar nahīñ mirī fitrat kā har amal

kyuuñ zulmat-e-gunāh-o-sazā tak pahuñch gayā

dast-e-junun jo band-e-qaba tak pahunch gaya

josh-e-bahaar husn-e-saba tak pahunch gaya

mujh par khula jo bab-e-rumuz-e-KHud-agahi

main KHud se ho ke zehn-e-KHuda tak pahunch gaya

aaya na zindagi ki haqiqat ka sang-e-mil

main sarhad-e-dayar-e-fana tak pahunch gaya

us but ki hai ata ki mera tamtaraq-e-harf

mearaj-e-hamd-o-madh-o-sana tak pahunch gaya

ahd-e-bahaar mein asar-e-sohbat-e-jamal

mere junun ki aab-o-hawa tak pahunch gaya

kuchh is tarah se fash hua wo ki aaina

har aks raaz-e-husn-o-ada tak pahunch gaya

kal bazm mein daraazi-e-shab ki chali jo baat

main raaz-dan tha zulf-e-rasa tak pahunch gaya

thi aql ham-rikab so mera junun-e-shauq

bhar kar zaqand arsh-o-sama tak pahunch gaya

gunji sada-e-sakit-o-KHamosh har taraf

jab main fareb-e-koh-e-nida tak pahunch gaya

'shaariq' KHabar nahin meri fitrat ka har amal

kyun zulmat-e-gunah-o-saza tak pahunch gaya