darun-e-jaan ka shagufa jala hua nikla

darūn-e-jāñ kā shagūfa jalā huā niklā

so jo sharār bhī niklā bujhā huā niklā

churā ke le ga.ī jaane havā-e-shab kyā kyā

uThe to ḳhvāb-darīchā khulā huā niklā

ik arse baad huī khul ke guftugū us se

ik arse baad vo kāñTā chubhā huā niklā

dharī hī rah ga.ī ḳhvāhish nihāl hone kī

numū kā daur thā aur dil dukhā huā niklā

khule paḌe the sabhī dar makān-e-hastī ke

makīn ḳhud kahīñ bāhar gayā huā niklā

fazā-e-jāñ meñ to ik iztirār thā hī magar

jahān-e-dil meñ bhī dhaḌkā lagā huā niklā

ik umr ḳhvāb meñ guzrī thī rañg bharte hue

khulī jab aañkh to manzar dhulā huā niklā

darun-e-jaan ka shagufa jala hua nikla

so jo sharar bhi nikla bujha hua nikla

chura ke le gai jaane hawa-e-shab kya kya

uThe to KHwab-daricha khula hua nikla

ek arse baad hui khul ke guftugu us se

ek arse baad wo kanTa chubha hua nikla

dhari hi rah gai KHwahish nihaal hone ki

numu ka daur tha aur dil dukha hua nikla

khule paDe the sabhi dar makan-e-hasti ke

makin KHud kahin bahar gaya hua nikla

faza-e-jaan mein to ek iztirar tha hi magar

jahan-e-dil mein bhi dhaDka laga hua nikla

ek umr KHwab mein guzri thi rang bharte hue

khuli jab aankh to manzar dhula hua nikla