chashm-e-hairat ko ta’alluq ki faza tak le gaya

chashm-e-hairat ko ta’alluq kī fazā tak le gayā

koī ḳhvāboñ se mujhe dasht-e-balā tak le gayā

TūTtī parchhā.iyoñ ke shahr meñ tanhā huuñ ab

hādsoñ kā silsila ġham-āshnā tak le gayā

dhuup dīvāroñ pe chaḌh kar dekhtī hī rah ga.ī

kaun sūraj ko añdheroñ kī guphā tak le gayā

'umr bhar milne nahīñ detī haiñ ab to ranjisheñ

vaqt ham se ruuTh jaane kī adā tak le gayā

is qadar gahrī udāsī kā sabab khultā nahīñ

jaise hoñToñ se koī harf-e-du'ā tak le gayā

jaane kis ummīd par ik aarzū kā silsila

mujh se paiham duur hotī ik sadā tak le gayā

ḳhaak meñ milte hue barg-e-ḳhizāñ se pūchhiye

kaun shāḳhoñ se use ūñchī havā tak le gayā

chashm-e-hairat ko ta’alluq ki faza tak le gaya

koi KHwabon se mujhe dasht-e-bala tak le gaya

TuTti parchhaiyon ke shahr mein tanha hun ab

hadson ka silsila gham-ashna tak le gaya

dhup diwaron pe chaDh kar dekhti hi rah gai

kaun suraj ko andheron ki gupha tak le gaya

'umr bhar milne nahin deti hain ab to ranjishen

waqt hum se ruTh jaane ki ada tak le gaya

is qadar gahri udasi ka sabab khulta nahin

jaise honTon se koi harf-e-du'a tak le gaya

jaane kis ummid par ek aarzu ka silsila

mujh se paiham dur hoti ek sada tak le gaya

KHak mein milte hue barg-e-KHizan se puchhiye

kaun shaKHon se use unchi hawa tak le gaya