charagh usne bujha bhi diya jala bhi diya

charāġh us ne bujhā bhī diyā jalā bhī diyā

ye merī qabr pe manzar nayā dikhā bhī diyā

ye chheḌ kyā hai ye kyā mujh se dil-lagī hai koī

jagāyā niiñd se jaagā to phir sulā bhī diyā

udhar thā lutf-o-karam un kā is taraf thā itaab

charāġh umiid kā raushan kiyā bujhā bhī diyā

ye shoḳhiyāñ na.ī dekhīñ tumhārī chitvan meñ

ki parda ruḳh pe liyā aur phir uThā bhī diyā

udhar lagāv idhar barhamī ke haiñ āsār

mujhe phañsā bhī liyā aur phir chhuḌā bhī diyā

nikal ga.e mirī āñkhoñ se saikaḌoñ aañsū

ḳhazāna jam' kiyā aur phir luTā bhī diyā

nayā hai husn ke bāzār kā utār-chaḌhāo

chaḌhāyā sar pe nigāhoñ se phir girā bhī diyā

zarā to pās-e-talab āshiqoñ kā tum karte

bulāyā paas bhī phir paas se haTā bhī diyā

ye un kā khel to dekho ki ek kāġhaz par

likhā bhī naam mirā aur phir miTā bhī diyā

agarche rāh-e-mohabbat hai tañg-o-tār magar

isī ke saath hameñ 'aql kā diyā bhī diyā

bashīr siiñg kaTā kar mile haiñ bachhḌoñ meñ

bane javān buḌhāpe kā ġham bhulā bhī diyā

charagh us ne bujha bhi diya jala bhi diya

ye meri qabr pe manzar naya dikha bhi diya

ye chheD kya hai ye kya mujh se dil-lagi hai koi

jagaya nind se jaga to phir sula bhi diya

udhar tha lutf-o-karam un ka is taraf tha itab

charagh umid ka raushan kiya bujha bhi diya

ye shoKHiyan nai dekhin tumhaari chitwan mein

ki parda ruKH pe liya aur phir uTha bhi diya

udhar lagaw idhar barhami ke hain aasar

mujhe phansa bhi liya aur phir chhuDa bhi diya

nikal gae meri aankhon se saikaDon aansu

KHazana jam' kiya aur phir luTa bhi diya

naya hai husn ke bazar ka utar-chaDhao

chaDhaya sar pe nigahon se phir gira bhi diya

zara to pas-e-talab aashiqon ka tum karte

bulaya pas bhi phir pas se haTa bhi diya

ye un ka khel to dekho ki ek kaghaz par

likha bhi nam mera aur phir miTa bhi diya

agarche rah-e-mohabbat hai tang-o-tar magar

isi ke sath hamein 'aql ka diya bhi diya

bashir sing kaTa kar mile hain bachhDon mein

bane jawan buDhape ka gham bhula bhi diya