chahe kuchh ho zer-e-ehsan apni nadari na rakh

chāhe kuchh ho zer-e-ehsāñ apnī nādārī na rakh

pattharoñ se bhar ke ye shīshe kī almārī na rakh

jang tū jiite ki haare ye alag ik baat hai

zehn-o-dil par ḳhauf dushman kā magar taarī na rakh

aaḌī tirchhī kuchh lakīreñ hī mileñgī shaam tak

shahr ke chaurāhe par tū apnī fankārī na rakh

ye buzurgoñ kī ravā-dārī ke pazhmurda gulāb

ābiyārī chāhte haiñ in meñ chingārī na rakh

hai tire insāf kā terī tarāzū se vaqār

baaT halke hoñ to aage chiiz bhī bhārī na rakh

zindagī ke aa.ine kī aab hai 'hāmid' ḳhudī

apnī sāñsoñ se judā ehsās-e-ḳhud-dārī na rakh

chahe kuchh ho zer-e-ehsan apni nadari na rakh

pattharon se bhar ke ye shishe ki almari na rakh

jang tu jite ki haare ye alag ek baat hai

zehn-o-dil par KHauf dushman ka magar tari na rakh

aaDi tirchhi kuchh lakiren hi milengi sham tak

shahr ke chaurahe par tu apni fankari na rakh

ye buzurgon ki rawa-dari ke pazhmurda gulab

aabiyari chahte hain in mein chingari na rakh

hai tere insaf ka teri taraazu se waqar

baT halke hon to aage chiz bhi bhaari na rakh

zindagi ke aaine ki aab hai 'hamid' KHudi

apni sanson se juda ehsas-e-KHud-dari na rakh