buton se kuchh na hua jo hua KHuda se hua

butoñ se kuchh na huā jo huā ḳhudā se huā

davā se kuchh na banā jo huā du'ā se huā

bharam darāzī-e-dāmān-e-yār kā na rahā

ajiib kaam mire dast-e-nā-rasā se huā

diloñ ko sabr-o-sukūñ to na mil sakā lekin

koī to kaam tirī chashm-e-bā-hayā se huā

lagā dī aag sī jañgal meñ nā-bakāroñ ke

ye fā.eda to mirī ātishīñ-navā se huā

diloñ ko ishq ne baḳhshī hayāt-e-ġham-afzā

ajab nishāna ḳhatā tīr-e-be-ḳhatā se huā

qalandaroñ ne ulaT dī bisāt-e-mai-ḳhāna

na rind se huā aur kuchh na pārsā se huā

muḳhālifoñ kī bhī jo dushmanī se ho na sakā

vo kaam ik mire dam-sāz-o-āshnā se huā

na kuchh bhī kar sake as.hāb-e-fīl the to bahut

jo kuchh huā tire darvesh-e-be-navā se huā

ghuTan to dil kī rahī qasr-e-marmarīñ meñ bhī

na raushnī se huā kuchh na kuchh havā se huā

vo ek qatl kā ilzām sar pe thā so rahā

qisās se na huā kuchh na ḳhūñ-bahā se huā

buton se kuchh na hua jo hua KHuda se hua

dawa se kuchh na bana jo hua du'a se hua

bharam daraazi-e-daman-e-yar ka na raha

ajib kaam mere dast-e-na-rasa se hua

dilon ko sabr-o-sukun to na mil saka lekin

koi to kaam teri chashm-e-ba-haya se hua

laga di aag si jangal mein na-bakaron ke

ye faeda to meri aatishin-nawa se hua

dilon ko ishq ne baKHshi hayat-e-gham-afza

ajab nishana KHata tir-e-be-KHata se hua

qalandaron ne ulaT di bisat-e-mai-KHana

na rind se hua aur kuchh na parsa se hua

muKHalifon ki bhi jo dushmani se ho na saka

wo kaam ek mere dam-saz-o-ashna se hua

na kuchh bhi kar sake ashab-e-fil the to bahut

jo kuchh hua tere darwesh-e-be-nawa se hua

ghuTan to dil ki rahi qasr-e-marmarin mein bhi

na raushni se hua kuchh na kuchh hawa se hua

wo ek qatl ka ilzam sar pe tha so raha

qisas se na hua kuchh na KHun-baha se hua