but bane rah takoge kab tak

but bane raah takoge kab tak

aas kī aañch sahoge kab tak

sar uThā kar kabhī dekho to sahī

dil kī duniyā meñ basoge kab tak

jis ne apnī bhī ḳhabar lī na kabhī

tum use yaad karoge kab tak

ham-safar ho to koī apnā-sā

chāñd ke saath chaloge kab tak

koī pattā hai na buuTā hai na gul

dasht ko baaġh kahoge kab tak

har taraf aag barastī hai yahāñ

kis tavaqqo.a pe rahoge kab tak

āñdhiyāñ tez huī jaatī haiñ

ghar bulātā hai chaloge kab tak

koī jā kar nahīñ aatā 'shohrat'

sūrat-e-sham.a ghuloge kab tak

but bane rah takoge kab tak

aas ki aanch sahoge kab tak

sar uTha kar kabhi dekho to sahi

dil ki duniya mein basoge kab tak

jis ne apni bhi KHabar li na kabhi

tum use yaad karoge kab tak

ham-safar ho to koi apna-sa

chand ke sath chaloge kab tak

koi patta hai na buTa hai na gul

dasht ko bagh kahoge kab tak

har taraf aag barasti hai yahan

kis tawaqqoa pe rahoge kab tak

aandhiyan tez hui jati hain

ghar bulata hai chaloge kab tak

koi ja kar nahin aata 'shohrat'

surat-e-shama ghuloge kab tak