be-karan dariya hun gham ka aur tughyani mein hun

be-karāñ dariyā huuñ ġham kā aur tuġhyānī meñ huuñ

sab hadeñ haiñ phir bhī qaa.em kab se hairānī meñ huuñ

shab kī tanhā.ī meñ mujh ko aisā lagtā hai kabhī

maiñ huuñ rūh-e-zindagī go paikar-e-fānī meñ huuñ

jagmagātī mahfil-e-aflāk merā aks-e-zāt

lau maiñ huuñ anjum kī maiñ sūraj kī tābānī meñ huuñ

subh-gāhāñ dasht o gulshan meñ nasīm-e-narm-mauj

biich dariyā ke bhañvar huuñ aur jaulānī meñ huuñ

sham'-e-bazm-e-dil-barāñ hai merī dil-sozī kī zau

maiñ dil-e-'āshiq ke ḳhvāboñ kī gul-afshānī meñ huuñ

log kyuuñ is shahr ke itne pareshāñ-hāl haiñ

maiñ ki ḳhush-dil thā sadā kā is pareshānī meñ huuñ

kyā ḳhabar merā safar hai aur kitnī duur kā

kāġhazī ik naav huuñ aur tez-rau paanī meñ huuñ

husn-e-kul kā ārzū-mand is tunuk-jānī meñ huuñ

mere qad se jo bahut ūñchā hai us paanī meñ huuñ

be-karan dariya hun gham ka aur tughyani mein hun

sab haden hain phir bhi qaem kab se hairani mein hun

shab ki tanhai mein mujh ko aisa lagta hai kabhi

main hun ruh-e-zindagi go paikar-e-fani mein hun

jagmagati mahfil-e-aflak mera aks-e-zat

lau main hun anjum ki main suraj ki tabani mein hun

subh-gahan dasht o gulshan mein nasim-e-narm-mauj

bich dariya ke bhanwar hun aur jaulani mein hun

sham'-e-bazm-e-dil-baran hai meri dil-sozi ki zau

main dil-e-'ashiq ke KHwabon ki gul-afshani mein hun

log kyun is shahr ke itne pareshan-haal hain

main ki KHush-dil tha sada ka is pareshani mein hun

kya KHabar mera safar hai aur kitni dur ka

kaghazi ek naw hun aur tez-rau pani mein hun

husn-e-kul ka aarzu-mand is tunuk-jaani mein hun

mere qad se jo bahut uncha hai us pani mein hun