baDhe kuchh aur kisi iltija se kam na hue

baḌhe kuchh aur kisī iltijā se kam na hue

mire harīf tumhārī duā se kam na hue

siyāh raat meñ dil ke muhīb sannāTe

ḳharosh-e-naġhma-e-shola-navā se kam na hue

vatan ko chhoḌ ke hijrat bhī kis ko raas aa.ī

masā.il un ke vahāñ bhī zarā se kam na hue

farāz-e-ḳhalq se apnā lahū bhī barsāyā

ġhubār phir bhī diloñ kī fazā se kam na hue

buland aur laveñ ho ga.iiñ ummīdoñ kī

diye vafā ke tumhārī jafā se kam na hue

bhañvar meñ Duub ke tārīḳh ban ga.e goyā

safīne ishq ke sail-e-balā se kam na hue

hamāre zehn bhaTakte rahe ḳhalāoñ meñ

safar nasīb ke zanjīr-e-pā se kam na hue

sadā bahār ḳhayābān-e-ārzū thā 'zafar'

lahū ke phuul hamārī qabā se kam na hue

baDhe kuchh aur kisi iltija se kam na hue

mere harif tumhaari dua se kam na hue

siyah raat mein dil ke muhib sannaTe

KHarosh-e-naghma-e-shola-nawa se kam na hue

watan ko chhoD ke hijrat bhi kis ko ras aai

masail un ke wahan bhi zara se kam na hue

faraaz-e-KHalq se apna lahu bhi barsaya

ghubar phir bhi dilon ki faza se kam na hue

buland aur lawen ho gain ummidon ki

diye wafa ke tumhaari jafa se kam na hue

bhanwar mein Dub ke tariKH ban gae goya

safine ishq ke sail-e-bala se kam na hue

hamare zehn bhaTakte rahe KHalaon mein

safar nasib ke zanjir-e-pa se kam na hue

sada bahaar KHayaban-e-arzu tha 'zafar'

lahu ke phul hamari qaba se kam na hue