apni nazar se TuT kar apni nazar mein gum hua

apnī nazar se TuuT kar apnī nazar meñ gum huā

vo baḌā bā-shu'ūr thā apne hī ghar meñ gum huā

marg-zada the rang sab aa.ine pusht-e-chashm the

ik vahī dard-mand thā ḳhauf-o-ḳhatar meñ gum huā

rāste aa.ine bane paañv tamām rang the

is pe bhī ye savāl vo kaise safar meñ gum huā

soch havās meñ na thī aañkh hudūd meñ na thī

peḌ havā meñ uḌ ga.e saañp khañDar meñ gum huā

har ḳhabar us se thī ḳhabar aur vo be-panāh thā

harf-zada huā to phir ek ḳhabar meñ gum huā

mauj-e-shafaq sarāb thī marg-e-nazar ḳhayāl thā

dā.era aab par rahā nuqta bhañvar meñ gum huā

mujh meñ the jitne 'aib vo mere qalam ne likh diye

mujh meñ thā jitnā husn vo mere hunar meñ gum huā

apni nazar se TuT kar apni nazar mein gum hua

wo baDa ba-shu'ur tha apne hi ghar mein gum hua

marg-zada the rang sab aaine pusht-e-chashm the

ek wahi dard-mand tha KHauf-o-KHatar mein gum hua

raste aaine bane panw tamam rang the

is pe bhi ye sawal wo kaise safar mein gum hua

soch hawas mein na thi aankh hudud mein na thi

peD hawa mein uD gae sanp khanDar mein gum hua

har KHabar us se thi KHabar aur wo be-panah tha

harf-zada hua to phir ek KHabar mein gum hua

mauj-e-shafaq sarab thi marg-e-nazar KHayal tha

daera aab par raha nuqta bhanwar mein gum hua

mujh mein the jitne 'aib wo mere qalam ne likh diye

mujh mein tha jitna husn wo mere hunar mein gum hua