airport station saDkon par hain kitne sare log

airport station saḌkoñ par haiñ kitne saare log

jaane kaun se sukh kī ḳhātir phirte maare maare log

shaam ga.e ye manzar ham ne mulkoñ mulkoñ dekhā hai

ghar lauTeñ bojhal qadmoñ se bujhe hue añgāre log

sab se shākī ḳhud se nālāñ apnī aag meñ jalte haiñ

dukh ke sivā aur kyā bāñTeñge in jaise añdhiyāre log

pur-nam āñkhoñ bojhal dil se kitnī baar vidā.ī lī

kitnā bojh liye phirte haiñ ham jaise banjāre log

vo kitne ḳhush-qismat the jo apne gharoñ ko lauT ga.e

shahroñ shahroñ ghuum rahe haiñ ham hālāt ke maare log

raat ga.e yādoñ ke jañgal meñ dīvālī hotī hai

diip sajā.e aa jaate haiñ bhūle bisre pyāre log

bachpan kitnā pyārā thā jab dil ko yaqīñ aa jaatā thā

marte haiñ to ban jaate haiñ āsmān ke taare log

airport station saDkon par hain kitne sare log

jaane kaun se sukh ki KHatir phirte mare mare log

sham gae ye manzar hum ne mulkon mulkon dekha hai

ghar lauTen bojhal qadmon se bujhe hue angare log

sab se shaki KHud se nalan apni aag mein jalte hain

dukh ke siwa aur kya banTenge in jaise andhiyare log

pur-nam aankhon bojhal dil se kitni bar widai li

kitna bojh liye phirte hain hum jaise banjare log

wo kitne KHush-qismat the jo apne gharon ko lauT gae

shahron shahron ghum rahe hain hum haalat ke mare log

raat gae yaadon ke jangal mein diwali hoti hai

dip sajae aa jate hain bhule bisre pyare log

bachpan kitna pyara tha jab dil ko yaqin aa jata tha

marte hain to ban jate hain aasman ke tare log