aashna hote hi us ishq ne mara mujhko

āshnā hote hī us ishq ne maarā mujh ko

na milā bahr-e-mohabbat kā kinārā mujh ko

kyuuñ mire qatl ko talvār barahna kī hai

teġh-e-abrū kā to kaafī hai ishārā mujh ko

ḳhud tire daam meñ aayā koī afsūñ na chalā

ai parī tū ne to shīshe meñ utārā mujh ko

mere iisā kā zarā dekhnā e.ajāz-e-ḳhirām

ek Thokar se milī umr dobārā mujh ko

maan.e daulat-e-dīdār na ho ai girya

ruḳh-e-mahbūb kā karne de nazārā mujh ko

dil meñ ik gauhar-e-ḳhūbī kī mohabbat kā hai josh

āj-kal bhātā hai dariyā kā kinārā mujh ko

Dam-dilāse hī meñ Taalā kiye har roz āḳhir

sūkhe ghaaT ai gul-e-tar ḳhuub utārā mujh ko

naqd-e-jāñ nazr karūñ tere phir ai qātil-e-ḳhalq

zinda kar de agar allāh dobārā mujh ko

phalv-e-yār ko ġhairoñ se jo ḳhālī paayā

dil-e-betāb ne kyā kyā na ubhārā mujh ko

maiñ yahāñ muntazir-e-va.ada rahā lekin vo

rah ga.e aur kahīñ de ke sahārā mujh ko

āḳhir insān huuñ patthar kā to rakhtā nahīñ dil

ai buto itnā satāo na ḳhudā-rā mujh ko

apne begāne se ab mujh ko shikāyat na rahī

dushmanī kar ke mire dost ne maarā mujh ko

phande meñ phañs ke maiñ us ke na huā phir jāñ-bar

tār-e-gesū ne tire maar utārā mujh ko

un ko sūjhā na zarā past-o-buland ulfat

ġhair se chiḌh ga.e nazroñ se utārā mujh ko

sadma-sohbat-e-aġhyār na uThegā kabhī

aur jo zulm karo sab haiñ gavārā mujh ko

shaad us se hoñ ki is qātil-e-ālam ne ḳhud aaj

kah ke o āshiq-e-nāshād pukārā mujh ko

jaañ dī ishq meñ us huur ke maiñ ne jo 'qalaq'

qabr meñ aa ke farishtoñ ne utārā mujh ko

aashna hote hi us ishq ne mara mujh ko

na mila bahr-e-mohabbat ka kinara mujh ko

kyun mere qatl ko talwar barahna ki hai

tegh-e-abru ka to kafi hai ishaara mujh ko

KHud tere dam mein aaya koi afsun na chala

ai pari tu ne to shishe mein utara mujh ko

mere isa ka zara dekhna eajaz-e-KHiram

ek Thokar se mili umr dobara mujh ko

mane daulat-e-didar na ho ai girya

ruKH-e-mahbub ka karne de nazara mujh ko

dil mein ek gauhar-e-KHubi ki mohabbat ka hai josh

aaj-kal bhata hai dariya ka kinara mujh ko

Dam-dilase hi mein Tala kiye har roz aaKHir

sukhe ghaT ai gul-e-tar KHub utara mujh ko

naqd-e-jaan nazr karun tere phir ai qatil-e-KHalq

zinda kar de agar allah dobara mujh ko

phalw-e-yar ko ghairon se jo KHali paya

dil-e-betab ne kya kya na ubhaara mujh ko

main yahan muntazir-e-wada raha lekin wo

rah gae aur kahin de ke sahaara mujh ko

aaKHir insan hun patthar ka to rakhta nahin dil

ai buto itna satao na KHuda-ra mujh ko

apne begane se ab mujh ko shikayat na rahi

dushmani kar ke mere dost ne mara mujh ko

phande mein phans ke main us ke na hua phir jaan-bar

tar-e-gesu ne tere mar utara mujh ko

un ko sujha na zara past-o-buland ulfat

ghair se chiDh gae nazron se utara mujh ko

sadma-sohbat-e-aghyar na uThega kabhi

aur jo zulm karo sab hain gawara mujh ko

shad us se hon ki is qatil-e-alam ne KHud aaj

kah ke o aashiq-e-nashad pukara mujh ko

jaan di ishq mein us hur ke main ne jo 'qalaq'

qabr mein aa ke farishton ne utara mujh ko