aankhon mein ashk bhar ke mujhse nazar mila ke

āñkhoñ meñ ashk bhar ke mujh se nazar milā ke

nīchī nigāh uTThī fitne na.e jagā ke

maiñ raag chheḌtā huuñ īmā-e-husn pā ke

dekho to merī jānib ik baar muskurā ke

duniyā-e-maslahat ke ye band kyā thameñge

baḌh jā.egā zamāna tūfāñ na.e uThā ke

jab chheḌtī haiñ un ko gumnām ārzūeñ

vo mujh ko dekhte haiñ merī nazar bachā ke

dīdār kī tamannā kal raat rakh rahī thī

ḳhvāboñ kī rah-guzar meñ sham.eñ jalā jalā ke

duurī ne laakh jalve taḳhlīq kar liye the

phir duur ho ga.e ham tere qarīb aa ke

shām-e-firāq aisā mahsūs ho rahā hai

har ek shai gañvā dī har ek shai ko pā ke

aa.ī hai yaad jin kī tūfān-e-dard ban ke

vo zaḳhm maiñ ne aksar khaa.e haiñ muskurā ke

merī nigāh-e-ġham meñ shikve hī sab nahīñ haiñ

ik baar idhar to dekho nīchī nazar uThā ke

ye dushmanī hai saaqī yā dostī hai saaqī

auroñ ko jaam denā mujh ko dikhā dikhā ke

dil ke qarīb shāyad tūfān uTh rahe hoñ

dekho to sher 'zaidī' ik roz gungunā ke

aankhon mein ashk bhar ke mujh se nazar mila ke

nichi nigah uTThi fitne nae jaga ke

main rag chheDta hun ima-e-husn pa ke

dekho to meri jaanib ek bar muskura ke

duniya-e-maslahat ke ye band kya thamenge

baDh jaega zamana tufan nae uTha ke

jab chheDti hain un ko gumnam aarzuen

wo mujh ko dekhte hain meri nazar bacha ke

didar ki tamanna kal raat rakh rahi thi

KHwabon ki rah-guzar mein shamen jala jala ke

duri ne lakh jalwe taKHliq kar liye the

phir dur ho gae hum tere qarib aa ke

sham-e-firaq aisa mahsus ho raha hai

har ek shai ganwa di har ek shai ko pa ke

aai hai yaad jin ki tufan-e-dard ban ke

wo zaKHm main ne aksar khae hain muskura ke

meri nigah-e-gham mein shikwe hi sab nahin hain

ek bar idhar to dekho nichi nazar uTha ke

ye dushmani hai saqi ya dosti hai saqi

auron ko jam dena mujh ko dikha dikha ke

dil ke qarib shayad tufan uTh rahe hon

dekho to sher 'zaidi' ek roz gunguna ke