aankh aur nind ke rishte mujhe wapas kar de
aañkh aur niiñd ke rishte mujhe vāpas kar de
mere ḳhvāboñ ke jazīre mujhe vāpas kar de
tujh ko manzūr nahīñ mujh ko hai ab bhī manzūr
merī qurbat mire bose mujhe vāpas kar de
apne māthe ke chamakte hue sūraj kī qasam
merī āñkhoñ ke savere mujhe vāpas kar de
zindagī sāya-e-gesū se nikal kar chup hai
merī zanjīr ke halqe mujhe vāpas kar de
na to parde haiñ, na gul-dān, na fānūs koī
ghar ke ḳhush-rang salīqe mujhe vāpas kar de
putliyāñ hiltī thiiñ jāpān kī guḌiyā kī tarah
ḳhvāb āñkhoñ ke darīche mujhe vāpas kar de
ek maḳhlūq ko jhuknā thā mire qadmoñ par
mere mahkūm farishte mujhe vāpas kar de
merī qadreñ mire maazī kī vo sachchī qadreñ
merī tahzīb ke rishte mujhe vāpas kar de
merā chehra mirī qāmat mirī 'azmat ke nishāñ
merī tārīḳh ke safhe mujhe vāpas kar de
bech dene pe bhī ghar lauT kar aa jaate the
vo vafādār parinde mujhe vāpas kar de
aa paḌī aisī zarūrat ki lahū pī jā.ūñ
ab mire ḳhuun ke rishte mujhe vāpas kar de
kis liye chhīn rahā hai tū mire ghar kā sukūñ
mere bachchoñ ke khilaune mujhe vāpas kar de
kaun kahtā hai ki jaane de mirī laash ko ghar
bas mire ḳhuun ke kapḌe mujhe vāpas kar de
mil rahī hai mujhe nā-karda gunāhoñ kī sazā
mere mālik mire sajde mujhe vāpas kar de
muntashir haiñ mirī bheḌeñ unheñ yakjā kar luuñ
mere rūhānī vasīle mujhe vāpas kar de
lā idhar, sāmne laa, TuuTī huī kashtī ko
maiñ salāmat huuñ vo taḳhte mujhe vāpas kar de
tū jinheñ bech ke ḳhush-hāl nahīñ hotā hai
qissa-go aise latīfe mujhe vāpas kar de
khel phir in ke binā khel na rah pā.egā
zid na kar taash ke patte mujhe vāpas kar de
aankh aur nind ke rishte mujhe wapas kar de
mere KHwabon ke jazire mujhe wapas kar de
tujh ko manzur nahin mujh ko hai ab bhi manzur
meri qurbat mere bose mujhe wapas kar de
apne mathe ke chamakte hue suraj ki qasam
meri aankhon ke sawere mujhe wapas kar de
zindagi saya-e-gesu se nikal kar chup hai
meri zanjir ke halqe mujhe wapas kar de
na to parde hain, na gul-dan, na fanus koi
ghar ke KHush-rang saliqe mujhe wapas kar de
putliyan hilti thin japan ki guDiya ki tarah
KHwab aankhon ke dariche mujhe wapas kar de
ek maKHluq ko jhukna tha mere qadmon par
mere mahkum farishte mujhe wapas kar de
meri qadren mere mazi ki wo sachchi qadren
meri tahzib ke rishte mujhe wapas kar de
mera chehra meri qamat meri 'azmat ke nishan
meri tariKH ke safhe mujhe wapas kar de
bech dene pe bhi ghar lauT kar aa jate the
wo wafadar parinde mujhe wapas kar de
aa paDi aisi zarurat ki lahu pi jaun
ab mere KHun ke rishte mujhe wapas kar de
kis liye chhin raha hai tu mere ghar ka sukun
mere bachchon ke khilaune mujhe wapas kar de
kaun kahta hai ki jaane de meri lash ko ghar
bas mere KHun ke kapDe mujhe wapas kar de
mil rahi hai mujhe na-karda gunahon ki saza
mere malik mere sajde mujhe wapas kar de
muntashir hain meri bheDen unhen yakja kar lun
mere ruhani wasile mujhe wapas kar de
la idhar, samne la, TuTi hui kashti ko
main salamat hun wo taKHte mujhe wapas kar de
tu jinhen bech ke KHush-haal nahin hota hai
qissa-go aise latife mujhe wapas kar de
khel phir in ke bina khel na rah paega
zid na kar tash ke patte mujhe wapas kar de
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
