aagah apni maut se koi bashar nahin

āgāh apnī maut se koī bashar nahīñ

sāmān sau baras kā hai pal kī ḳhabar nahīñ

aa jaa.eñ rob-e-ġhair meñ ham vo bashar nahīñ

kuchh aap kī tarah hameñ logoñ kā Dar nahīñ

jis par paḌe phir us ko ḳhudā hī panāh de

teġh-e-nigāh-e-yār kī paidā sipar nahīñ

mash.hūr ḳhalq 'īsā-e-daurāñ to ho magar

lekin marīz-e-'ishq kī jānib nazar nahīñ

ik to shab-e-firāq ke sadme haiñ jāñ-gudāz

andher is pe ye hai ki hotī sahar nahīñ

sard sahī jo kahte haiñ shā'ir tumheñ bajā

be-shak nihāl-e-'aish ho lekin samar nahīñ

kyā kahiye is tarah ke talavvun-mizāj ko

vā'de kā hai ye haal idhar haañ udhar nahīñ

kyā jāneñ kaisī joḌ jamā.ī raqīb ne

aise ḳhafā haiñ bolte do dopahar nahīñ

rakhte qadam jo vādī-e-ulfat meñ be-dhaḌak

'hairat' sivā tumhāre kisī kā jigar nahīñ

aagah apni maut se koi bashar nahin

saman sau baras ka hai pal ki KHabar nahin

aa jaen rob-e-ghair mein hum wo bashar nahin

kuchh aap ki tarah hamein logon ka Dar nahin

jis par paDe phir us ko KHuda hi panah de

tegh-e-nigah-e-yar ki paida sipar nahin

mashhur KHalq 'isa-e-dauran to ho magar

lekin mariz-e-'ishq ki jaanib nazar nahin

ek to shab-e-firaq ke sadme hain jaan-gudaz

andher is pe ye hai ki hoti sahar nahin

sard sahi jo kahte hain sha'ir tumhein baja

be-shak nihaal-e-'aish ho lekin samar nahin

kya kahiye is tarah ke talawwun-mizaj ko

wa'de ka hai ye haal idhar han udhar nahin

kya jaanen kaisi joD jamai raqib ne

aise KHafa hain bolte do dopahar nahin

rakhte qadam jo wadi-e-ulfat mein be-dhaDak

'hairat' siwa tumhaare kisi ka jigar nahin