ek shahr-e-naapaid kaa marsiya

makkhiyoñ aur logoñ kī kasrat se āThoñ pahar gūñjtā merā shahr hai

merī āñkheñ isī kī havā meñ khulīñ

aur is kī fasīloñ pe phirte hue

maiñ ne āñkhoñ se ojhal

manāzir ko sochā

jinheñ dekhne ke liye zindagī bhar safar kā jahannum sahā

yahīñ maiñ ne sīkhe mohabbat ke mā'nī

yahīñ par nafas ke pas-o-pesh kā farq jaanā

yahīñ maiñ ne dekhā ki kaise gharoñ se bichhaḌne kā ġham

aadmī ko zamīñ kī tahoñ meñ chhupe 'ālamoñ kī tarah roltā hai

isī shahr meñ mujh ko vālid ne chīzoñ kī pahchān dī

aur dikhā.e mujhe

dasht meñ raqs karte sarāboñ ke chakkar

lapaktī huī aag dariyā umañDtī ghaTāoñ ke lashkar

nafī aur isbāt kā farq niile samundar ke be-ant manzar

ye batāyā mujhe

kis tarah sabr karte haiñ kaise buzurgoñ kī pākīza rūhoñ se miltā hai faizān

usī raushnī kā

bahāroñ kī nikhrī huī tāzgī kā

jo ab tak nigāhoñ meñ utrī nahīñ

āstīn-e-zamīñ meñ yā batn-e-sadaf meñ kahīñ dafn hai

us masīhā-sifat ke liye muntazir

jo use khoj kar

dahr kī tīrgī ko naved-e-masarrat se raushan karegā

mire baap ne mujh ko din raat ke intizār-e-musalsal se vāqif kiyā

aur duniyā ke naqshe pe us shahr ko DhūñDne kī lagan

dil ko dī

vo tilismāt kā shahr-e-nāpaid jo

hū-ba-hū

mere is shahr kā 'aks hai

us kī āñkhoñ kā rang aur phīkī hañsī bhī isī shahr sī hai

magar us ke tan par jo be-hunar vahshiyoñ kā Thikānā nahīñ

jo na in chīthḌā-posh āvāra-gardoñ kī vahshat sarā hai

na garmī ke mausam meñ Dastī huī makkhiyoñ aur logoñ kī kasrat se

āThoñ pahar gūñjtā hai

makkhiyon aur logon ki kasrat se aaThon pahar gunjta mera shahr hai

meri aankhen isi ki hawa mein khulin

aur is ki fasilon pe phirte hue

main ne aankhon se ojhal

manazir ko socha

jinhen dekhne ke liye zindagi bhar safar ka jahannum saha

yahin main ne sikhe mohabbat ke ma'ni

yahin par nafas ke pas-o-pesh ka farq jaana

yahin main ne dekha ki kaise gharon se bichhaDne ka gham

aadmi ko zamin ki tahon mein chhupe 'alamon ki tarah rolta hai

isi shahr mein mujh ko walid ne chizon ki pahchan di

aur dikhae mujhe

dasht mein raqs karte sarabon ke chakkar

lapakti hui aag dariya umanDti ghaTaon ke lashkar

nafi aur isbaat ka farq nile samundar ke be-ant manzar

ye bataya mujhe

kis tarah sabr karte hain kaise buzurgon ki pakiza ruhon se milta hai faizan

usi raushni ka

bahaaron ki nikhri hui tazgi ka

jo ab tak nigahon mein utri nahin

aastin-e-zamin mein ya batn-e-sadaf mein kahin dafn hai

us masiha-sifat ke liye muntazir

jo use khoj kar

dahr ki tirgi ko nawed-e-masarrat se raushan karega

mere bap ne mujh ko din raat ke intizar-e-musalsal se waqif kiya

aur duniya ke naqshe pe us shahr ko DhunDne ki lagan

dil ko di

wo tilismat ka shahr-e-napaid jo

hu-ba-hu

mere is shahr ka 'aks hai

us ki aankhon ka rang aur phiki hansi bhi isi shahr si hai

magar us ke tan par jo be-hunar wahshiyon ka Thikana nahin

jo na in chithDa-posh aawara-gardon ki wahshat sara hai

na garmi ke mausam mein Dasti hui makkhiyon aur logon ki kasrat se

aaThon pahar gunjta hai