qadir-nama-e-ghaalib

qādir aur allāh aur yazdāñ ḳhudā

hai nabī mursal payambar rahnumā

peshvā-e-dīñ ko kahte haiñ imaam

vo rasūlullāh kā qā.em-maqām

hai sahābī dost ḳhālis naab hai

jam.a us kī yaad rakh as.hāb hai

bandagī kā haañ ibādat naam hai

nek-baḳhtī kā sa.ādat naam hai

kholnā iftār hai aur roza saum

lail ya.anī raat din aur roz yaum

hai salāt ai mehrbāñ ism-e-namāz

jis ke paḌhne se ho raazī be-niyāz

jā-namāz aur phir musallā hai vahī

aur sajjāda bhī goyā hai vahī

ism vo hai jis ko tum kahte ho naam

ka.aba makka vo jo hai bait-ul-harām

gird phirne ko kaheñge ham tavāf

baiTh rahnā goshe meñ hai etakāf

phir falak charḳh aur gardūñ aur sip.har

āsmāñ ke naam haiñ ai rashk-e-mehr

mahr sūraj chāñd ko kahte haiñ maah

hai mohabbat mehr lāzim hai nibāh

ġharb pachchhim aur pūrab sharq hai

abr badlī aur bijlī barq hai

aag kā ātish aur aazar naam hai

aur añgāre kā aḳhgar naam hai

teġh kī hindī agar talvār hai

fārsī pagḌī kī bhī dastār hai

nevlā raasū hai aur tā.ūs mor

kabk ko hindī meñ kahte haiñ chakor

ḳhum hai maTkā aur Thiliyā hai subū

aab paanī bahr dariyā nahar jū

chaah ko kahte haiñ hindī meñ kuaañ

duud ko hindī meñ kahte haiñ dhuāñ

duudh jo piine kā hai vo shiir hai

tifl laḌkā aur būḌhā piir hai

siina chhātī dast haath aur pā paañv

shāḳh Tahnī barg pattā saaya chhāñv

maah chāñd aḳhtar haiñ taare raat shab

daañt dandāñ hoñT ko kahte haiñ lab

ustuḳhvāñ haDDī hai aur hai post khaal

sag hai kuttā aur gīdaḌ hai shaġhāl

til ko kunjad aur ruḳh kā gaal kah

gaal par jo til ho us ko ḳhaal kah

kekḌā sartān hai kachhvā sañg-pusht

saaq pinDlī fārsī muTThī kī musht

hai shikam peT aur baġhal āġhosh hai

kahnī ārnej aur kandhā dosh hai

hindī meñ aqrab kā bichchhū naam hai

fārsī meñ bhauñ kā abrū naam hai

hai vahī kazdam jise aqrab kaheñ

niish hai vo Dañk jis ko sab kaheñ

hai laḌā.ī harb aur jañg ek chiiz

ka.ab Taḳhnā aur shatālañg ek chiiz

naak biinī parra nathunā gosh kaan

kaan kī lau narma hai ai mehrbān

chashm hai aañkh aur mizhgāñ hai palak

aañkh kī putlī ko kahiye mardumak

muñh pe gar jhurrī paḌe āzañg jaan

fārsī chhīñke kī to āvañg jaan

massā āzaḳh aur chhālā aabla

aur hai daa.ī janā.ī qābla

uuñT ushtur aur ashġhar siyah hai

gosht hai lahm aur charbī piyā hai

hai zanaḳh ThoḌī zaqan bhī hai vahī

ḳhaad hai chiil aur zaġhan bhī hai vahī

phir ġhalīvāz us ko kahiye jo hai chiil

chyūñTī hai mor aur hāthī hai fiil

lomḌī rubāh aur aahū hiran

shams sūraj aur shuā us kī kiran

asp jab hindī meñ ghoḌā naam paa.e

tāziyāna kyoñ na kuuḌā naam paa.e

gurba billī muush chūhā daam jaal

rishta taagā jaama kapḌā qaht kaal

ḳhar gadhā aur is ko kahte haiñ ulāġh

degdāñ chūlhā jise kahiye ujāġh

hindī chiḌiyā fārsī gunjishk hai

meñgnī jis ko kaheñ vo pishk hai

taaba hai bhaa.ī tave kī fārsī

aur tiihū hai loī kī fārsī

naam makḌī kā qallāsh aur ankabūt

kahte haiñ machhlī ko maahī aur huut

pishsha machchhar aur makkhī hai magas

āshiyāna ghoñsla piñjra qafas

bheḌiyā gurg aur bakrī gospañd

mesh kā hai naam bheḌ ai ḳhud-pasand

naam gul kā phuul shabnam os hai

jis ko naqqārā kaheñ vo kuus hai

saqf chhat hai sañg patthar iiñT ḳhisht

jo burā hai us ko ham kahte haiñ zisht

ḳhaar kāñTā daaġh dhabba naġhma raag

siim chāñdī mas hai tāñbā baḳht bhaag

zar hai sonā aur zar-gar hai sunār

mauz kelā aur kakḌī hai ḳhayār

riish dāḌhī muuch sablat aur burūt

ahmaq aur nādān ko kahte haiñ uut

zindagānī hai hayāt aur marg maut

shave ḳhāvind aur hai añbāġh saut

jumla sab aur nisf aadhā rub.a paao

sarsar āñdhī cell naala baad baav

hai jarāhat aur zaḳhm aur ghaav riish

bhaiñs ko kahte haiñ bhaa.ī gaav mesh

haft saat aur hasht aaTh aur bast biis

sī agar kahiye to hindī us kī tiis

hai chahal chālīs aur panjāh pachās

nā-umīdī yaas aur ummīd aas

dosh kal kī raat aur imroz aaj

ird aaTā aur ġhalla hai anaaj

chāhiye hai maañ ko mādar jānñā

aur bhaa.ī ko barādar jānñā

phāoḌā bail aur darāñtī vaas hai

fārsī kaah aur hindī ghaas hai

sabz ho jab tak use kahiye gayāh

ḳhushk ho jaatī hai tab kahte haiñ kaah

chaksa puḌiyā kiise kā thailī hai naam

fārsī meñ dhappe kā sailī hai naam

aḳhalkandū jhunjunā nero hai zor

bādfar phirkī hai aur hai duzd chor

añgbīñ shahd aur asal ye ai aziiz

naam ko haiñ tiin par hai ek chiiz

aajil aur āroġh kī hindī Dakār

mai sharāb aur piine vaalā mai-gusār

ruuī ko kahte haiñ pamba sun rakho

aam ko kahte haiñ añba sun rakho

ḳhāna ghar hai aur koThā baam hai

qila dazh khaa.ī kā ḳhandaq naam hai

hai binaulā puñba-dāna lā-kalām

aur tarbuz-e-hind daana lā-kalām

gar darīcha fārsī khiḌkī kī hai

sarzanish bhī fārsī jhiḌkī kī hai

hai kahānī kī fasāna fārsī

aur sho.ale kī zabāna fārsī

na.al dar ātish usī kā naam hai

jo ki bechain aur be-ārām hai

past aur sattū ko kahte haiñ savīq

zharf aur gahre ko kahte haiñ amiiq

taar taanā paud baanā yaad rakh

āzmūdan āzmānā yaad rakh

yuusa machchhī chāhnā hai ḳhvāstan

kam hai andak aur ghaTānā kāstan

ḳhush raho hañsne ko ḳhandīdan kaho

gar Daro Darne ko tarsīdan kaho

hai harāsīdan bhī Darnā kyoñ Daro

aur jañgīdan hai laḌnā kyoñ laḌo

hai guzarne kī guzashtan fārsī

aur phirne kī hai gashtan fārsī

vo sarodan hai jise gaanā kaheñ

hai vo āvurdan jise laanā kaheñ

zīstan ko jān-e-man jiinā kaho

aur noshīdan ko tum piinā kaho

dauḌne kī fārsī hai tāḳhtan

khelne kī fārsī hai bāḳhtan

dūḳhtan siinā darīdan phāḌnā

kāshtan bonā hai raftan jhāḌnā

kāshtan bonā hai aur kashtan bhī hai

kātne kī fārsī rashtan bhī hai

hai Tapakne kī chakīdan fārsī

aur sunñe kī shunīdan fārsī

kūdnā jastan burīdan kāTnā

aur yasīdan kī hindī chāTnā

dekhnā dīdan ramīdan bhāgnā

jaan lo bedār būdan jāgnā

āmdan aanā banānā sāḳhtan

Dālne kī fārsī andāḳhtan

soḳhtan jalnā chamaknā tāftan

DhūñDhnā justan hai paanā yāftan

bāñdhnā bastan kushādan kholnā

dāshtan rakhnā hai saḳhtan tolnā

tolne ko aur sanjīdan kaho

phir ḳhafā hone ko ranjīdan kaho

fārsī sone ko ḳhuftan jāniye

muñh se kuchh kahne ko guftan jāniye

khīñchne kī hai kashīdan fārsī

aur ugne kī damīdan fārsī

ūñghnā pūchho ġhunūdan jaan lo

māñjhnā chāho zadūdan jaan lo

hai qalam kā fārsī meñ ḳhāma naam

hai ġhazal kā fārsī meñ chāma naam

kis ko kahte haiñ ġhazal irshād ho

haañ ġhazal paḌhiye sabaq gar yaad ho

sub.h se dekheñge rasta yaar kā

jum'e ke din va.ada hai dīdār kā

vo churāve baaġh meñ meva jise

phāñd jaanā yaad ho dīvār kā

pul hī par se pher laa.e ham ko log

varna thā apnā irāda paar kā

shahar meñ chhaḌiyoñ ke maile kī hai bhiiḌ

aaj aalam aur hai bāzār kā

laal Diggī par karegā jā ke kyā

pul pe chal hai aaj din itvār kā

gar na Dar jaao to dikhlā.ūñ tumheñ

kaaT apnī kaaTh kī talvār kā

vaah be laḌke paḌhī achchhī ġhazal

shauq abhī se hai tujhe ash.ār kā

to suno kal kā sabaq aa jaao tum

pozī afsār aur dumchī pārdum

chhalnī ko ġhirbāl parvīzan kaho

chhed ko tum raḳhna aur rauzan kaho

che ke ma.anī kyā chagoyam kyā kahūñ

man shuum ḳhāmosh maiñ chup ho rahūñ

baaz ḳhvāhm raft maiñ phir jā.ūñgā

naan ḳhvāham ḳhurd roTī khā.ūñgā

fārsī kyoñ kī chirā hai yaad rakh

aur ghanTālā darā hai yaad rakh

dasht sahrā aur jañgal ek hai

phir sah-shamba aur mañgal ek hai

jis ko nādāñ kahiye vo anjān hai

fārsī beñgan kī bāzinjān hai

jis ko kahte haiñ jamā.ī faaza hai

jo hai añgḌā.ī vahī ḳhamyāza hai

yārah kahte haiñ kaḌe ko ham se pūchh

paaḌ hai tālār ik aalam se pūchh

jis tarah gahne kī zevar fārsī

us tarah hañsulī kī pargar fārsī

bhiḌ kī bhaa.ī fārsī zambūr hai

dispanā unbar hai aur anbūr hai

fārsī ā.īna hindī aarsī

aur hai kan.ghe kī shāna fārsī

hiiñg angūza hai aur arzīr raañg

saaz baajā aur hai āvāz baañg

zauja jorū yazna bahnoī ko jaan

ḳhashm ġhusse aur bad-ḳhūī ko jaan

lohe ko kahte haiñ aahan aur hadīd

jo na.ī ho chiiz use kahiye jadīd

hai navā āvāz sāmāñ aur ol

narḳh qīmat aur bahā ye sab haiñ mol

siir lahsan torob muulī turah saag

khā baḳhūr barḳhez uTh ba-gurez bhaag

ruuī kī puunī kā hai pāġhunad naam

dok takle ko kaheñge lā-kalām

getī aur gīhāñ hai duniyā yaad rakh

aur hai naddāf dhuniyā yaad rakh

koh ko hindī meñ kahte haiñ pahāḌ

fārsī gulḳhan hai aur hindī hai bhaaḌ

takiya bālish aur bichhaunā bistara

asl bistar hai samajh lo tum zarā

bistara boleñ sipāhī aur faqīr

varna bistar kahte haiñ barnā-o-pīr

piir būḌhā aur barnā hai javāñ

jaan ko albatta kahte haiñ ruvāñ

iiñT ke gaare kā naam āzañd hai

hai nasīhat bhī vahī jo pand hai

pand ko andarz bhī kahte haiñ haañ

arz hai par marz bhī kahte haiñ haañ

kyā hai arz aur marz tum samjhe zamīñ

unuq gardan aur peshānī jabīñ

aas chukī āsiyā mash.hūr hai

aur faufal chhāliyā mash.hūr hai

bāñsulī nai aur jalājil jhāñjh hai

phir satarvan aur 'aqīma bāñjh hai

kuhl surma aur salā.ī miil hai

jis ko jholī kahiye vo zambīl hai

paayā qādir naame ne aaj iḳhtitām

ik ġhazal tum aur paḌh lo vassalām

sher ke paḌhne meñ kuchh hāsil nahīñ

māntā lekin hamārā dil nahīñ

ilm se hī qadar hai insān kī

hai vahī insān jo jāhil nahīñ

kyā kaheñ khaa.ī hai hāfiz jī kī maar

aaj hañste aap jo khil-khil nahīñ

kis tarah paḌhte ho ruk ruk kar sabaq

aise paḌhne kā to maiñ qaa.il nahīñ

jis ne qādir naama saarā paḌh liyā

us ko aamad naama kuchh mushkil nahīñ

qadir aur allah aur yazdan KHuda

hai nabi mursal payambar rahnuma

peshwa-e-din ko kahte hain imam

wo rasulullah ka qaem-maqam

hai sahabi dost KHalis nab hai

jama us ki yaad rakh ashab hai

bandagi ka han ibaadat nam hai

nek-baKHti ka saadat nam hai

kholna iftar hai aur roza saum

lail yani raat din aur roz yaum

hai salat ai mehrban ism-e-namaz

jis ke paDhne se ho raazi be-niyaz

ja-namaz aur phir musalla hai wahi

aur sajjada bhi goya hai wahi

ism wo hai jis ko tum kahte ho nam

kaba makka wo jo hai bait-ul-haram

gird phirne ko kahenge hum tawaf

baiTh rahna goshe mein hai etakaf

phir falak charKH aur gardun aur siphar

aasman ke nam hain ai rashk-e-mehr

mahr suraj chand ko kahte hain mah

hai mohabbat mehr lazim hai nibah

gharb pachchhim aur purab sharq hai

abr badli aur bijli barq hai

aag ka aatish aur aazar nam hai

aur angare ka aKHgar nam hai

tegh ki hindi agar talwar hai

farsi pagDi ki bhi dastar hai

newla rasu hai aur taus mor

kabk ko hindi mein kahte hain chakor

KHum hai maTka aur Thiliya hai subu

aab pani bahr dariya nahar ju

chah ko kahte hain hindi mein kuan

dud ko hindi mein kahte hain dhuan

dudh jo pine ka hai wo shir hai

tifl laDka aur buDha pir hai

sina chhati dast hath aur pa panw

shaKH Tahni barg patta saya chhanw

mah chand aKHtar hain tare raat shab

dant dandan honT ko kahte hain lab

ustuKHwan haDDi hai aur hai post khaal

sag hai kutta aur gidaD hai shaghaal

til ko kunjad aur ruKH ka gal kah

gal par jo til ho us ko KHal kah

kekDa sartan hai kachhwa sang-pusht

saq pinDli farsi muTThi ki musht

hai shikam peT aur baghal aaghosh hai

kahni aarnej aur kandha dosh hai

hindi mein aqrab ka bichchhu nam hai

farsi mein bhaun ka abru nam hai

hai wahi kazdam jise aqrab kahen

nish hai wo Dank jis ko sab kahen

hai laDai harb aur jang ek chiz

kab TaKHna aur shatalang ek chiz

nak bini parra nathuna gosh kan

kan ki lau narma hai ai mehrban

chashm hai aankh aur mizhgan hai palak

aankh ki putli ko kahiye mardumak

munh pe gar jhurri paDe aazang jaan

farsi chhinke ki to aawang jaan

massa aazaKH aur chhaala aabla

aur hai dai janai qabla

unT ushtur aur ashghar siyah hai

gosht hai lahm aur charbi piya hai

hai zanaKH ThoDi zaqan bhi hai wahi

KHad hai chil aur zaghan bhi hai wahi

phir ghaliwaz us ko kahiye jo hai chil

chyunTi hai mor aur hathi hai fil

lomDi rubah aur aahu hiran

shams suraj aur shua us ki kiran

asp jab hindi mein ghoDa nam pae

taziyana kyon na kuDa nam pae

gurba billi mush chuha dam jal

rishta taga jama kapDa qaht kal

KHar gadha aur is ko kahte hain ulagh

degdan chulha jise kahiye ujagh

hindi chiDiya farsi gunjishk hai

meingni jis ko kahen wo pishk hai

taba hai bhai tawe ki farsi

aur tihu hai loi ki farsi

nam makDi ka qallash aur ankabut

kahte hain machhli ko mahi aur hut

pishsha machchhar aur makkhi hai magas

aashiyana ghonsla pinjra qafas

bheDiya gurg aur bakri gospand

mesh ka hai nam bheD ai KHud-pasand

nam gul ka phul shabnam os hai

jis ko naqqara kahen wo kus hai

saqf chhat hai sang patthar inT KHisht

jo bura hai us ko hum kahte hain zisht

KHar kanTa dagh dhabba naghma rag

sim chandi mas hai tanba baKHt bhag

zar hai sona aur zar-gar hai sunar

mauz kela aur kakDi hai KHayar

rish daDhi much sablat aur burut

ahmaq aur nadan ko kahte hain ut

zindagani hai hayat aur marg maut

shawe KHawind aur hai anbagh saut

jumla sab aur nisf aadha ruba pao

sarsar aandhi cell nala baad baw

hai jarahat aur zaKHm aur ghaw rish

bhains ko kahte hain bhai gaw mesh

haft sat aur hasht aaTh aur bast bis

si agar kahiye to hindi us ki tis

hai chahal chaalis aur panjah pachas

na-umidi yas aur ummid aas

dosh kal ki raat aur imroz aaj

ird aaTa aur ghalla hai anaj

chahiye hai man ko madar jaanna

aur bhai ko baradar jaanna

phaoDa bail aur daranti was hai

farsi kah aur hindi ghas hai

sabz ho jab tak use kahiye gayah

KHushk ho jati hai tab kahte hain kah

chaksa puDiya kise ka thaili hai nam

farsi mein dhappe ka saili hai nam

aKHalkandu jhunjuna nero hai zor

baadfar phirki hai aur hai duzd chor

angbin shahd aur asal ye ai aziz

nam ko hain tin par hai ek chiz

aajil aur aarogh ki hindi Dakar

mai sharab aur pine wala mai-gusar

rui ko kahte hain pamba sun rakho

aam ko kahte hain anba sun rakho

KHana ghar hai aur koTha baam hai

qila dazh khai ka KHandaq nam hai

hai binaula punba-dana la-kalam

aur tarbuz-e-hind dana la-kalam

gar daricha farsi khiDki ki hai

sarzanish bhi farsi jhiDki ki hai

hai kahani ki fasana farsi

aur shoale ki zabana farsi

nal dar aatish usi ka nam hai

jo ki bechain aur be-aram hai

past aur sattu ko kahte hain sawiq

zharf aur gahre ko kahte hain amiq

tar tana paud bana yaad rakh

aazmudan aazmana yaad rakh

yusa machchhi chahna hai KHwastan

kam hai andak aur ghaTana kastan

KHush raho hansne ko KHandidan kaho

gar Daro Darne ko tarsidan kaho

hai harasidan bhi Darna kyon Daro

aur jangidan hai laDna kyon laDo

hai guzarne ki guzashtan farsi

aur phirne ki hai gashtan farsi

wo sarodan hai jise gana kahen

hai wo aawurdan jise lana kahen

zistan ko jaan-e-man jina kaho

aur noshidan ko tum pina kaho

dauDne ki farsi hai taKHtan

khelne ki farsi hai baKHtan

duKHtan sina daridan phaDna

kashtan bona hai raftan jhaDna

kashtan bona hai aur kashtan bhi hai

katne ki farsi rashtan bhi hai

hai Tapakne ki chakidan farsi

aur sunne ki shunidan farsi

kudna jastan buridan kaTna

aur yasidan ki hindi chaTna

dekhna didan ramidan bhagna

jaan lo bedar budan jagna

aamdan aana banana saKHtan

Dalne ki farsi andaKHtan

soKHtan jalna chamakna taftan

DhunDhna justan hai pana yaftan

bandhna bastan kushadan kholna

dashtan rakhna hai saKHtan tolna

tolne ko aur sanjidan kaho

phir KHafa hone ko ranjidan kaho

farsi sone ko KHuftan jaaniye

munh se kuchh kahne ko guftan jaaniye

khinchne ki hai kashidan farsi

aur ugne ki damidan farsi

unghna puchho ghunudan jaan lo

manjhna chaho zadudan jaan lo

hai qalam ka farsi mein KHama nam

hai ghazal ka farsi mein chama nam

kis ko kahte hain ghazal irshad ho

han ghazal paDhiye sabaq gar yaad ho

subh se dekhenge rasta yar ka

jum'e ke din wada hai didar ka

wo churawe bagh mein mewa jise

phand jaana yaad ho diwar ka

pul hi par se pher lae hum ko log

warna tha apna irada par ka

shahar mein chhaDiyon ke maile ki hai bhiD

aaj aalam aur hai bazar ka

lal Diggi par karega ja ke kya

pul pe chal hai aaj din itwar ka

gar na Dar jao to dikhlaun tumhein

kaT apni kaTh ki talwar ka

wah be laDke paDhi achchhi ghazal

shauq abhi se hai tujhe ashaar ka

to suno kal ka sabaq aa jao tum

pozi afsar aur dumchi pardum

chhalni ko ghirbaal parwizan kaho

chhed ko tum raKHna aur rauzan kaho

che ke mani kya chagoyam kya kahun

man shum KHamosh main chup ho rahun

baz KHwahm raft main phir jaunga

nan KHwaham KHurd roTi khaunga

farsi kyon ki chira hai yaad rakh

aur ghanTala dara hai yaad rakh

dasht sahra aur jangal ek hai

phir sah-shamba aur mangal ek hai

jis ko nadan kahiye wo anjaan hai

farsi bengan ki bazinjaan hai

jis ko kahte hain jamai faza hai

jo hai angDai wahi KHamyaza hai

yarah kahte hain kaDe ko hum se puchh

paD hai talar ek aalam se puchh

jis tarah gahne ki zewar farsi

us tarah hansuli ki pargar farsi

bhiD ki bhai farsi zambur hai

dispana unbar hai aur anbur hai

farsi aaina hindi aarsi

aur hai kanghe ki shana farsi

hing anguza hai aur arzir rang

saz baja aur hai aawaz bang

zauja joru yazna bahnoi ko jaan

KHashm ghusse aur bad-KHui ko jaan

lohe ko kahte hain aahan aur hadid

jo nai ho chiz use kahiye jadid

hai nawa aawaz saman aur ol

narKH qimat aur baha ye sab hain mol

sir lahsan torob muli turah sag

kha baKHur barKHez uTh ba-gurez bhag

rui ki puni ka hai paghunad nam

dok takle ko kahenge la-kalam

geti aur gihan hai duniya yaad rakh

aur hai naddaf dhuniya yaad rakh

koh ko hindi mein kahte hain pahaD

farsi gulKHan hai aur hindi hai bhaD

takiya baalish aur bichhauna bistara

asl bistar hai samajh lo tum zara

bistara bolen sipahi aur faqir

warna bistar kahte hain barna-o-pir

pir buDha aur barna hai jawan

jaan ko albatta kahte hain ruwan

inT ke gare ka nam aazand hai

hai nasihat bhi wahi jo pand hai

pand ko andarz bhi kahte hain han

arz hai par marz bhi kahte hain han

kya hai arz aur marz tum samjhe zamin

unuq gardan aur peshani jabin

aas chuki aasiya mashhur hai

aur faufal chhaaliya mashhur hai

bansuli nai aur jalajil jhanjh hai

phir satarwan aur 'aqima banjh hai

kuhl surma aur salai mil hai

jis ko jholi kahiye wo zambil hai

paya qadir name ne aaj iKHtitam

ek ghazal tum aur paDh lo wassalam

sher ke paDhne mein kuchh hasil nahin

manta lekin hamara dil nahin

ilm se hi qadar hai insan ki

hai wahi insan jo jahil nahin

kya kahen khai hai hafiz ji ki mar

aaj hanste aap jo khil-khil nahin

kis tarah paDhte ho ruk ruk kar sabaq

aise paDhne ka to main qail nahin

jis ne qadir nama sara paDh liya

us ko aamad nama kuchh mushkil nahin