javāz kuchh nahīñ hotā hamārī ḳhushiyoñ kā

udaas rahne kā koī sabab nahīñ hotā

jawaz kuchh nahin hota hamari KHushiyon ka

udas rahne ka koi sabab nahin hota

vo ik jagah na kahīñ rah sakā aur us ke saath

kirāya-dār the ham bhī makāñ badalte rahe

wo ek jagah na kahin rah saka aur us ke sath

kiraya-dar the hum bhi makan badalte rahe

har shai ko zamīñ apnī taraf khīñch rahī hai

kab aatā hai dhartī pe gagan dekhte rahnā

har shai ko zamin apni taraf khinch rahi hai

kab aata hai dharti pe gagan dekhte rahna

agar jahāñ meñ koī aa.inā nahīñ terā

to phir tujhī ko tire rū-ba-rū karūñgā maiñ

agar jahan mein koi aaina nahin tera

to phir tujhi ko tere ru-ba-ru karunga main

vo ḳhafā haiñ to raheñ ham ko manānā bhī nahīñ

un ko aanā bhī nahīñ ham ko bulānā bhī nahīñ

wo KHafa hain to rahen hum ko manana bhi nahin

un ko aana bhi nahin hum ko bulana bhi nahin