zindagi se KHitab

mirā vujūd tire vāste dhuāñ hī sahī

mirā ḳhayāl bhī vajh-e-'azāb-e-jāñ hī sahī

maiñ ab bas ek aziyyat sahī fuġhāñ hī sahī

shigāf Dhotā huā zard āsmāñ hī sahī

magar maiñ terī mohabbat kā ḳhvāb bhī rahā huuñ

ye aur baat ki ab ḳhitta-e-tabāh meñ huuñ

nigāh-e-shāh kā vāris ‘itāb-e-shāh meñ huuñ

taġhayyurāt ke mausam kī bārgāh meñ huuñ

bichhaḌ ke ḳhud se 'azābāt-e-be-panāh meñ huuñ

huuñ ab jo raakh to kuchh din gulāb bhī rahā huuñ

ai zindagī mujhe yak-laḳht mustarad to na kar

faqat mire liye tafrīq-e-nek-o-bad to na kar

maiñ tere saath chalā huuñ ab itnī had to na kar

mujhe pachhāḌne meñ itnī shadd-o-mad to na kar

maiñ ek 'umr tirā intiḳhāb bhī rahā huuñ

mera wujud tere waste dhuan hi sahi

mera KHayal bhi wajh-e-'azab-e-jaan hi sahi

main ab bas ek aziyyat sahi fughan hi sahi

shigaf Dhota hua zard aasman hi sahi

magar main teri mohabbat ka KHwab bhi raha hun

ye aur baat ki ab KHitta-e-tabah mein hun

nigah-e-shah ka waris ‘itab-e-shah mein hun

taghayyuraat ke mausam ki bargah mein hun

bichhaD ke KHud se 'azabaat-e-be-panah mein hun

hun ab jo rakh to kuchh din gulab bhi raha hun

ai zindagi mujhe yak-laKHt mustarad to na kar

faqat mere liye tafriq-e-nek-o-bad to na kar

main tere sath chala hun ab itni had to na kar

mujhe pachhaDne mein itni shadd-o-mad to na kar

main ek 'umr tera intiKHab bhi raha hun