naghmon ka zahr

maiñ jab gahrī tanhā.ī ke ġhaar meñ chhup kar

arz-o-samā se naata toḌ liyā kartā huuñ

gum-gashta rangoñ ke hayūle

band āñkhoñ ke sahrāoñ meñ tair rahe hote haiñ

bhūle-bhaTke naag ka.ī yādoñ ke

so.e zehn meñ jaag uThte haiñ

aaj kī fikr aur kal ke ḳhadshe

vahshī tishna ārzuoñ ke saaz bajāte

soī huī ḳhāmosh samā'at par tīroñ kī baaḌh lagā dete haiñ

sākit jism kī jānib pil paḌte haiñ

ek qayāmat jaag uThtī hai

ik naġhmoñ kā sail ubal paḌtā hai

merī rag rag meñ naġhmoñ kā zahr sarāyat kar jaatā hai

maiñ jo sukūñ ko DhūñDh rahā huuñ

mujh ko shāyad maut kī gūñgī sard guphā meñ chain milegā

jis meñ naġhmoñ kā zahrāb nahīñ hotā hai

lekin koī maut kī gūñgī sard guphā se lauT ke bhī aatā hai

mujh ko ye naġhmoñ kā zahr gavārā

mujh ko ziist gavārā!

main jab gahri tanhai ke ghaar mein chhup kar

arz-o-sama se nata toD liya karta hun

gum-gashta rangon ke hayule

band aankhon ke sahraon mein tair rahe hote hain

bhule-bhaTke nag kai yaadon ke

soe zehn mein jag uThte hain

aaj ki fikr aur kal ke KHadshe

wahshi tishna aarzuon ke saz bajate

soi hui KHamosh sama'at par tiron ki baDh laga dete hain

sakit jism ki jaanib pil paDte hain

ek qayamat jag uThti hai

ek naghmon ka sail ubal paDta hai

meri rag rag mein naghmon ka zahr sarayat kar jata hai

main jo sukun ko DhunDh raha hun

mujh ko shayad maut ki gungi sard gupha mein chain milega

jis mein naghmon ka zahrab nahin hota hai

lekin koi maut ki gungi sard gupha se lauT ke bhi aata hai

mujh ko ye naghmon ka zahr gawara

mujh ko zist gawara!