wahime

kal raat ki chāñd Dhal rahā thā

koī mirā dil masal rahā thā

tū thā ki tirā ḳhayāl thā vo

koī mire saath chal rahā thā

pattoñ pe machal rahe the saa.e

har phuul diyā sā jal rahā thā

aise meñ tire ḳhayāl se bhī

jī thā ki nahīñ bahal rahā thā

siine ke udhaḌ rahe the Tāñke

jaise koī dil ko mal rahā thā

uljhe hue vāhimoñ kā laavā

chehre pe ubal ubal rahā thā

us vaqt na-jāne tū kahāñ thā

gum-sum sā thā yā machal rahā thā

yādoñ meñ yūñhī ghirā thā tū bhī

yā dostoñ meñ bahal rahā thā

kal raat ki chand Dhal raha tha

koi mera dil masal raha tha

tu tha ki tera KHayal tha wo

koi mere sath chal raha tha

patton pe machal rahe the sae

har phul diya sa jal raha tha

aise mein tere KHayal se bhi

ji tha ki nahin bahal raha tha

sine ke udhaD rahe the Tanke

jaise koi dil ko mal raha tha

uljhe hue wahimon ka lawa

chehre pe ubal ubal raha tha

us waqt na-jaane tu kahan tha

gum-sum sa tha ya machal raha tha

yaadon mein yunhi ghira tha tu bhi

ya doston mein bahal raha tha