hazrat firaq

kyuuñ gulshan-e-adab kā har ik phuul hai udaas

kyā koī daaġh de gayā aur le gayā hai baas

chhāyā huā chaman pe hai kyuuñ abr-e-huzn-o-ġham

kaisā ye sāniha hai ki kho baiThe sab havās

thā daur-e-nau kā 'mīr' ḳhud apnā javāb thā

duniyā-e-'ilm-o-fikr kā vo āftāb thā

har anjuman meñ ban ke rahā markaz-e-nigāh

yā'nī 'firāq' ahl-e-suḳhan kī kitāb thā

she'r-o-adab kī shaan thā urdu kī jaan thā

raghupat-sahā.e naam kā insāñ mahān thā

sab qadr-dāñ the us ke ho europe ki asia

shaidā na us kā sirf ye hindostān thā

takte haiñ raah log ye kis ishtiyāq meñ

arbāb-e-fikr rote haiñ kis ke firāq meñ

us kā ye dars yaad bahut aa rahā hai aaj

rāhat bhī hai falāh bhī hai ittifāq meñ

kyun gulshan-e-adab ka har ek phul hai udas

kya koi dagh de gaya aur le gaya hai bas

chhaya hua chaman pe hai kyun abr-e-huzn-o-gham

kaisa ye saniha hai ki kho baiThe sab hawas

tha daur-e-nau ka 'mir' KHud apna jawab tha

duniya-e-'ilm-o-fikr ka wo aaftab tha

har anjuman mein ban ke raha markaz-e-nigah

ya'ni 'firaq' ahl-e-suKHan ki kitab tha

she'r-o-adab ki shan tha urdu ki jaan tha

raghupat-sahae nam ka insan mahan tha

sab qadr-dan the us ke ho europe ki asia

shaida na us ka sirf ye hindostan tha

takte hain rah log ye kis ishtiyaq mein

arbab-e-fikr rote hain kis ke firaq mein

us ka ye dars yaad bahut aa raha hai aaj

rahat bhi hai falah bhi hai ittifaq mein