akele kamre mein

abhī se un ke liye itnī be-qarār na ho

kiyā hai mujh ko bahut be-qarār chheḌā hai

tumhāre sher sunā kar tumhāre sar kī qasam

saheliyoñ ne mujhe baar baar chheḌā hai

kashish nahīñ hai tumhāre binā bahāroñ meñ

ye chhat ye chāñd sitāre udaas lagte haiñ

chaman kā rañg nasīm-e-sahar gulāb ke phuul

nahīñ ho tum to ye saare udaas lagte haiñ

ḳhabar sunī hai kabhī jab tumhāre aane kī

maiñ aa.ine meñ dulhan ban ke muskurā.ī huuñ

ga.ī huuñ dāman-e-dil ko ḳhushī se bharne magar

jahān bhar kī udāsī sameT laa.ī huuñ

kahīñ pe gaa.e ga.e haiñ jo giit bābul ke

to ajnabī se ḳhayāloñ meñ kho ga.ī huuñ maiñ

tumhārī yaad ke siine pe bār-hā 'āzar'

tasavvurāt kā sar rakh ke so ga.ī huuñ maiñ

tumheñ yaqīn na hogā akele kamre meñ

maiñ apnī jaan se pyāre ḳhutūt paḌhtī huuñ

tamām raat tumheñ yaad kartī rahtī huuñ

tamām raat tumhāre ḳhutūt paḌhtī huuñ

tum aa bhī jaao ki guzre hue dinoñ kī tarah

sulag na jaa.eñ kahīñ hasratoñ kī tasvīreñ

udaas pā ke na chheḌeñ saheliyāñ mujh ko

badal bhī do mirī tanhā.iyoñ kī taqdīreñ

abhi se un ke liye itni be-qarar na ho

kiya hai mujh ko bahut be-qarar chheDa hai

tumhaare sher suna kar tumhaare sar ki qasam

saheliyon ne mujhe bar bar chheDa hai

kashish nahin hai tumhaare bina bahaaron mein

ye chhat ye chand sitare udas lagte hain

chaman ka rang nasim-e-sahar gulab ke phul

nahin ho tum to ye sare udas lagte hain

KHabar suni hai kabhi jab tumhaare aane ki

main aaine mein dulhan ban ke muskurai hun

gai hun daman-e-dil ko KHushi se bharne magar

jahan bhar ki udasi sameT lai hun

kahin pe gae gae hain jo git babul ke

to ajnabi se KHayalon mein kho gai hun main

tumhaari yaad ke sine pe bar-ha 'azar'

tasawwuraat ka sar rakh ke so gai hun main

tumhein yaqin na hoga akele kamre mein

main apni jaan se pyare KHutut paDhti hun

tamam raat tumhein yaad karti rahti hun

tamam raat tumhaare KHutut paDhti hun

tum aa bhi jao ki guzre hue dinon ki tarah

sulag na jaen kahin hasraton ki taswiren

udas pa ke na chheDen saheliyan mujh ko

badal bhi do meri tanhaiyon ki taqdiren