bambai raat samundar

samundar boltā hai

samundar apnī pur-asrār maujoñ kī zabāñ meñ boltā hai

samundar kī sadā.eñ chiir detī haiñ shab-e-tārīk kī chādar

ubal paḌtī haiñ

tasalsul aur tavātur ke davā.ir meñ thiraktī haiñ

suroñ ke daane ik tasbīh ban jaate haiñ ''lai'' ke narm hāthoñ meñ

jo is āvāz ke jaadū ke bas meñ hote jaate haiñ

samundar kā kinārā saleT hai jis par

umaDtī Dūbtī lahreñ bikhar kar chhoḌ jaatī haiñ

samundar chhīn ke iqlīdsī ḳhāke

ajab andāz kī tajrīdī tasvīreñ

mohan-jodāḌo se pahle ke rasm-ul-ḳhat kī tahrīreñ

paḌe haiñ gate-way-of-india ke farsh par be-ghar bhikārī

udhar haiñ kuchh juārī

idhar ik happy laḌkī apne happy dost ke pahlū meñ simTī

chilam kā dam lagātī hai

surāġh-e-jannat-ul-maut ke tālib haiñ donoñ ek sādhū se

hashīshī nashshe ke dariyā meñ ġhote khā rahe haiñ

hashīshī nashshe hī kī mauj hai goyā samundar kī sadā bhī

samundar kī siyāhī par vo piilī raushnī ke phuul

jahāzoñ ne bikhere haiñ

añdhere meñ nazar aatā nahīñ jin kā koī mastūl

jahāz ārām karte haiñ

jahāzī shahr ke ishrat-kadoñ meñ ġhota-zan hoñge

hujūm-e-hashr-sāmāñ ke samundar meñ

jahāzī chand qatroñ kī tarah ghul-mil ga.e hoñge

yahāñ to nārsī-sas bhī kahīñ bhī ḳhud-girafta rah nahīñ saktā

samundar chheḌtā hai sāhirāna simfanī jis meñ

navājil devtāoñ ke azal-āsār shañkhoñ kī

navājil deviyoñ ke mor-pañkhoñ kī

sadā aapas meñ dhakkā mārtī muñh-zor maujoñ kī

sadā sāhil kī chaTTānoñ se Takrātī huī pur-shor maujoñ kī

sadā us shahr kī jo nashshe ke aalam meñ jaarī aur saarī hai

sadā us shahr kī jis ke muqaddar meñ hai roz o shab kī bedārī

sadā us shahr kī jis meñ daraḳhtoñ aur parindoñ se ziyāda aadmī hoñge

sadā us shahr kī jis meñ ki insānoñ ke chhatte āsmāñ chhūte hue ma.alūm hote haiñ

ubal paḌtā hai darvāzoñ se galiyoñ aur saḌkoñ ke muhānoñ se

ik ādam-zād chyūñTī-dal

jahāñ har-dam balā-raftār kāroñ aur basoñ kī ham-navā ban kar

mashīneñ ahd-e-hāzir kā qasīda paḌhtī rahtī haiñ

samundar ke kināre kā mashīnī shahr sāzīna hai

jis par ātish o aahan ke naġhme raqs karte haiñ

samundar ke kināre mard o zan kā ik samundar aur bhī hai

samundar kī sadā meñ us samundar kī sadā.eñ Duub jaatī haiñ

be-karānī kī sadā meñ

samundar bolta hai

samundar apni pur-asrar maujon ki zaban mein bolta hai

samundar ki sadaen chir deti hain shab-e-tarik ki chadar

ubal paDti hain

tasalsul aur tawatur ke dawair mein thirakti hain

suron ke dane ek tasbih ban jate hain lai ke narm hathon mein

jo is aawaz ke jadu ke bas mein hote jate hain

samundar ka kinara saleT hai jis par

umaDti Dubti lahren bikhar kar chhoD jati hain

samundar chhin ke iqlidsi KHake

ajab andaz ki tajridi taswiren

mohan-jodaDo se pahle ke rasm-ul-KHat ki tahriren

paDe hain gate-way-of-india ke farsh par be-ghar bhikari

udhar hain kuchh juari

idhar ek happy laDki apne happy dost ke pahlu mein simTi

chilam ka dam lagati hai

suragh-e-jannat-ul-maut ke talib hain donon ek sadhu se

hashishi nashshe ke dariya mein ghote kha rahe hain

hashishi nashshe hi ki mauj hai goya samundar ki sada bhi

samundar ki siyahi par wo pili raushni ke phul

jahazon ne bikhere hain

andhere mein nazar aata nahin jin ka koi mastul

jahaz aaram karte hain

jahazi shahr ke ishrat-kadon mein ghota-zan honge

hujum-e-hashr-saman ke samundar mein

jahazi chand qatron ki tarah ghul-mil gae honge

yahan to narsi-sas bhi kahin bhi KHud-girafta rah nahin sakta

samundar chheDta hai sahirana simfani jis mein

nawajil dewtaon ke azal-asar shankhon ki

nawajil dewiyon ke mor-pankhon ki

sada aapas mein dhakka marti munh-zor maujon ki

sada sahil ki chaTTanon se Takraati hui pur-shor maujon ki

sada us shahr ki jo nashshe ke aalam mein jari aur sari hai

sada us shahr ki jis ke muqaddar mein hai roz o shab ki bedari

sada us shahr ki jis mein daraKHton aur parindon se ziyaada aadmi honge

sada us shahr ki jis mein ki insanon ke chhatte aasman chhute hue malum hote hain

ubal paDta hai darwazon se galiyon aur saDkon ke muhanon se

ek aadam-zad chyunTi-dal

jahan har-dam bala-raftar karon aur bason ki ham-nawa ban kar

mashinen ahd-e-hazir ka qasida paDhti rahti hain

samundar ke kinare ka mashini shahr sazina hai

jis par aatish o aahan ke naghme raqs karte hain

samundar ke kinare mard o zan ka ek samundar aur bhi hai

samundar ki sada mein us samundar ki sadaen Dub jati hain

be-karani ki sada mein