ahl-e-dil aur bhi hain

kyā huā gar mire yāroñ kī zabāneñ chup haiñ

mere shāhid mire yāroñ ke sivā aur bhī haiñ

ahl-e-dil aur bhī haiñ ahl-e-vafā aur bhī haiñ

ek ham hī nahīñ duniyā se ḳhafā aur bhī haiñ

ham pe hī ḳhatm nahīñ maslak-e-shorīda-sirī

chāk-dil aur bhī haiñ chāk-qabā aur bhī haiñ

sar salāmat hai to kyā sañg-e-malāmat kī kamī

jaan baaqī hai to paikān-e-qazā aur bhī haiñ

munsif-e-shahr kī vahdat pe na harf aa jaa.e

log kahte haiñ ki arbab-e-jafā aur bhī haiñ

kya hua gar mere yaron ki zabanen chup hain

mere shahid mere yaron ke siwa aur bhi hain

ahl-e-dil aur bhi hain ahl-e-wafa aur bhi hain

ek hum hi nahin duniya se KHafa aur bhi hain

hum pe hi KHatm nahin maslak-e-shorida-siri

chaak-dil aur bhi hain chaak-qaba aur bhi hain

sar salamat hai to kya sang-e-malamat ki kami

jaan baqi hai to paikan-e-qaza aur bhi hain

munsif-e-shahr ki wahdat pe na harf aa jae

log kahte hain ki arbab-e-jafa aur bhi hain