diwali

har ik makāñ meñ jalā phir diyā dīvālī kā

har ik taraf ko ujālā huā dīvālī kā

sabhī ke jī ko samāñ bhā gayā dīvālī kā

kisī ke dil ko mazā ḳhush lagā dīvālī kā

'ajab bahār kā hai din banā dīvālī kā

jahāñ meñ yār-o-'ajab tarah kā hai ye tyauhār

ki lip rahe haiñ dar-o-bām kūcha-o-bāzār

khilaune kheloñ batāshoñ kā garm hai bāzār

kisī ne naqd liyā aur koī kare hai udhār

sabhī ko fikr hai ab jā-ba-jā dīvālī kā

khilaune miTTī ke ghar meñ koī le aatā hai

charāġh daan koī batriyāñ mañgātā hai

sohālī gūcha-o-maTrī koī pakātā hai

dīvālī puuje hai hañs hañs diye jalātā hai

har ek ghar meñ samāñ chhā gayā dīvālī kā

jahāñ meñ vo jo khāte haiñ seTh sāhūkār

do-shāla shawl zarī taash bādle kī bahār

khilaune kheloñ batāshoñ ke lag rahe ambār

charāġh jalte haiñ ghar ho rahā hai sab gulzār

khilā hai sāmne ik baaġh sā dīvālī kā

koī kahe hai is hāthī kā bolo kyā loge

ye do jo ghoḌe haiñ un kā bhī kyā bhalā loge

koī kahe hai ki is bail kā Takā loge

vo kahtā hai ki miyāñ jaao baiTho kyā loge

Take ko le lo koī chau-ghaḌā dīvālī kā

koī khaḌā faqat ik chau-ghaḌā chukāne ko

koī jo gajrī kā paisa lagā batāne ko

vo kahtā hai ki maiñ bechūñgā pāñch aane ko

ye paisā rakkho tum apne afiim khāne ko

ki jis kī lahr meñ dekho mazā dīvālī kā

haTā hai mor pe laḌkā kisī kā yā chelā

koī gilahrī ke nau daam de hai yā dhelā

vo dhelā pheñk ke us kā kumhār albelā

khilaunā pheñk ke kahtā hai chal mujhe ve lā

tū hī to aayā hai gāhak baḌā dīvālī kā

kabūtaroñ kā kisī ne liyā na bel chukā

koī chhadām ko rakhtā hai bahū-bel chukā

vo kahtā hai ki miyāñ lo jī us kā mail chukā

ye dhun hai dil meñ to laḌkā tumhārā khel chukā

chabīnā laḌke ko do tum dilā dīvālī kā

udhar ye dhuum udhar josh par ju-e-ḳhāne

qimār-bāz lage jā-ba-jā se vaañ aane

ashrafī kauḌī-o-paise rupa.e lage aane

tamām juvārī hue māl-o-zar ke dīvāne

sabhoñ ke sar pe chaḌhā bhuut sā dīvālī kā

sirf harām kī kauḌī kā jin kā hai byopār

unhoñ ne khāyā hai us din ke vāste hī udhār

kahe haiñ hañs ke qarz-ḳhvāh se har ik ik baar

dīvālī aa.ī hai sab diye dilā.eñge ai yaar

ḳhudā ke fazl se hai aasrā dīvālī kā

huā milāp sabhoñ meñ ga.ī diloñ kī ruuTh

har ek hāth, lage dānav aane sach aur jhuuT

chaḌhā hai miir bisātoñ ke muñh pe rang anuuT

sulliyāñ pheñkte haiñ aur kahīñ haiñ takī muuTh

ki jis ke shor se ghar bhar gayā dīvālī kā

makān liip ke Thiliyāñ jo korī rakhavā.ī

jalā charāġh ko kauḌī vo jald jhankā.ī

asl juārī the un meñ to jaan sī aa.ī

ḳhushī se kuud uchhal kar pukāre o bhaa.ī

shugūn pahle karo tum zarā dīvālī kā

shagun kī baazī lagī pahlī baar ġhanDe kī

phir is se baḌh ke lagī tiin chaar ġhanDe kī

baḌhī jo aisī tarah baar baar ġhanDe kī

to aage lagne lagī phir hazār ġhanDe kī

kamāl-e-narḳh lagā phir to aa dīvālī kā

kisī ne ghar kī havelī girau rakhā haarī

jo kuchh thī jins mayassar banā banā haarī

kisī ne chiiz kasī kī churā chhupā haarī

kasī nai gaThrī paḌosan kī apnī lā haarī

ye haar jiit kā charchā paḌā dīvālī kā

kisī ne daav pe lā nkī muuTh ne maarā

kisī ke ghar pe dharā soḳhta ne angārā

kisī ko nard ke chaupaḌ ke kar diyā zaarā

lañgoTī bāñdh ke baiThā izaar tak haarā

ye shor aa ke machā jā-ba-jā dīvālī kā

kisī kī jorū kahe hai pukār de bhaḌve

bahū kī nau-girhī, beTe ke haath ke khaḌve

jo ghar meñ aave to sab mil kahe haiñ sau ghaḌve

nikal tū yaañ se tirā kaam yaañ nahīñ bhaḌve

ḳhudā ne tujh ko to shohdā kiyā dīvālī kā

vo us ke jhoñTe pakaḌ kar kahe hai māruñgā

tirā jo gahnā hai sab taar taar utārūñgā

havelī apnī to ik daao par maiñ hārūñgā

ye sab to haarā huuñ ḳhandī tujhe bhī hārūñgā

chaḌhā hai mujh ko bhī ab to nasha dīvālī kā

tujhe ḳhabar nahīñ ḳhandī ye lat vo pyārī hai

kisī zamāne meñ aage huā jo juārī hai

to us ne jorū kī nath aur izaar utārī hai

izaar kyā hai ki jorū talak bhī haarī hai

sunā ye tū ne nahīñ mājrā dīvālī kā

jahāñ meñ ye jo dīvālī kī sair hotī hai

to zar se hotī hai aur zar baġhair hotī hai

jo haare un pe ḳharābī kī ḳhair hotī hai

aur un meñ aan ke jin jin kī ḳhair hotī hai

to aaḌe aatā hai un meñ diyā dīvālī kā

ye bāteñ sach haiñ na jhuuT un ko jāniyo yaaro

nasīhateñ haiñ inhīñ dil se māniyo yaaro

jahāñ ko jaao ye qissa bakhāniyo yaaro

jo juārī ho na burā us kā māniyo yaaro

'nazīr' aap bhī hai juvāriyā dīvālī kā

har ek makan mein jala phir diya diwali ka

har ek taraf ko ujala hua diwali ka

sabhi ke ji ko saman bha gaya diwali ka

kisi ke dil ko maza KHush laga diwali ka

'ajab bahaar ka hai din bana diwali ka

jahan mein yar-o-'ajab tarah ka hai ye tyauhaar

ki lip rahe hain dar-o-baam kucha-o-bazar

khilaune khelon batashon ka garm hai bazar

kisi ne naqd liya aur koi kare hai udhaar

sabhi ko fikr hai ab ja-ba-ja diwali ka

khilaune miTTi ke ghar mein koi le aata hai

charagh dan koi batriyan mangata hai

sohaali gucha-o-maTri koi pakata hai

diwali puje hai hans hans diye jalata hai

har ek ghar mein saman chha gaya diwali ka

jahan mein wo jo khate hain seTh sahukar

do-shaala shawl zari tash baadle ki bahaar

khilaune khelon batashon ke lag rahe ambar

charagh jalte hain ghar ho raha hai sab gulzar

khila hai samne ek bagh sa diwali ka

koi kahe hai is hathi ka bolo kya loge

ye do jo ghoDe hain un ka bhi kya bhala loge

koi kahe hai ki is bail ka Taka loge

wo kahta hai ki miyan jao baiTho kya loge

Take ko le lo koi chau-ghaDa diwali ka

koi khaDa faqat ek chau-ghaDa chukane ko

koi jo gajri ka paisa laga batane ko

wo kahta hai ki main bechunga panch aane ko

ye paisa rakkho tum apne afim khane ko

ki jis ki lahr mein dekho maza diwali ka

haTa hai mor pe laDka kisi ka ya chela

koi gilahri ke nau dam de hai ya dhela

wo dhela phenk ke us ka kumhaar albela

khilauna phenk ke kahta hai chal mujhe we la

tu hi to aaya hai gahak baDa diwali ka

kabutaron ka kisi ne liya na bel chuka

koi chhadam ko rakhta hai bahu-bel chuka

wo kahta hai ki miyan lo ji us ka mail chuka

ye dhun hai dil mein to laDka tumhaara khel chuka

chabina laDke ko do tum dila diwali ka

udhar ye dhum udhar josh par ju-e-KHane

qimar-baz lage ja-ba-ja se wan aane

ashrafi kauDi-o-paise rupae lage aane

tamam juwari hue mal-o-zar ke diwane

sabhon ke sar pe chaDha bhut sa diwali ka

sirf haram ki kauDi ka jin ka hai byopar

unhon ne khaya hai us din ke waste hi udhaar

kahe hain hans ke qarz-KHwah se har ek ek bar

diwali aai hai sab diye dilaenge ai yar

KHuda ke fazl se hai aasra diwali ka

hua milap sabhon mein gai dilon ki ruTh

har ek hath, lage danaw aane sach aur jhuT

chaDha hai mir bisaton ke munh pe rang anuT

sulliyan phenkte hain aur kahin hain taki muTh

ki jis ke shor se ghar bhar gaya diwali ka

makan lip ke Thiliyan jo kori rakhawai

jala charagh ko kauDi wo jald jhankai

asl juari the un mein to jaan si aai

KHushi se kud uchhal kar pukare o bhai

shugun pahle karo tum zara diwali ka

shagun ki bazi lagi pahli bar ghanDe ki

phir is se baDh ke lagi tin chaar ghanDe ki

baDhi jo aisi tarah bar bar ghanDe ki

to aage lagne lagi phir hazar ghanDe ki

kamal-e-narKH laga phir to aa diwali ka

kisi ne ghar ki haweli girau rakha haari

jo kuchh thi jins mayassar bana bana haari

kisi ne chiz kasi ki chura chhupa haari

kasi nai gaThri paDosan ki apni la haari

ye haar jit ka charcha paDa diwali ka

kisi ne daw pe la nki muTh ne mara

kisi ke ghar pe dhara soKHta ne angara

kisi ko nard ke chaupaD ke kar diya zara

langoTi bandh ke baiTha izar tak haara

ye shor aa ke macha ja-ba-ja diwali ka

kisi ki joru kahe hai pukar de bhaDwe

bahu ki nau-girhi, beTe ke hath ke khaDwe

jo ghar mein aawe to sab mil kahe hain sau ghaDwe

nikal tu yan se tera kaam yan nahin bhaDwe

KHuda ne tujh ko to shohda kiya diwali ka

wo us ke jhonTe pakaD kar kahe hai marunga

tera jo gahna hai sab tar tar utarunga

haweli apni to ek dao par main haarunga

ye sab to haara hun KHandi tujhe bhi haarunga

chaDha hai mujh ko bhi ab to nasha diwali ka

tujhe KHabar nahin KHandi ye lat wo pyari hai

kisi zamane mein aage hua jo juari hai

to us ne joru ki nath aur izar utari hai

izar kya hai ki joru talak bhi haari hai

suna ye tu ne nahin majra diwali ka

jahan mein ye jo diwali ki sair hoti hai

to zar se hoti hai aur zar baghair hoti hai

jo haare un pe KHarabi ki KHair hoti hai

aur un mein aan ke jin jin ki KHair hoti hai

to aaDe aata hai un mein diya diwali ka

ye baaten sach hain na jhuT un ko jaaniyo yaro

nasihaten hain inhin dil se maniyo yaro

jahan ko jao ye qissa bakhaniyo yaro

jo juari ho na bura us ka maniyo yaro

'nazir' aap bhi hai juwariya diwali ka