mere baba

mujhe yaad aatī hai baabā tirī

mujhe yaad aatī hai baabā tirī

mire sar kī chhat ab kahāñ rah ga.ī hai

tirī yaad bas ab yahāñ rah ga.ī hai

aziyyat haiñ yādoñ ko dil meñ basānā

kahāñ ab hai hāsil mujhe vo zamāna

kaTegī kahāñ ab ye dukh kī ghaḌī

mujhe yaad aatī hai baabā tirī

baḌe laaD se tū ne ham ko thā paalā

khilāyā hameñ apne muñh kā nivāla

paḌī mushkileñ to diyā saath tū ne

qadam laḌkhaḌā.e diyā haath tū ne

ki ab to haiñ ashkoñ se āñkheñ bharī

mujhe yaad aatī hai baabā tirī

koī hai yahāñ aisā koī hai vaisā

nahīñ koī hai mere baabā ke jaisā

mirī ḳhvāhishoñ ko yuuñ puurā kiyā thā

jo māñgā thā maiñ ne vo lā ke diyā thā

magar ab to dekho mirī bebasī

mujhe yaad aatī hai baabā tirī

achānak tirā haath hāthoñ se chhūTā

ki shīshe ke mānind dil merā TuuTā

batā.ūñ maiñ kaise ki thā din vo kaisā

qayāmat se pahle qayāmat ke jaisā

tire saath meñ hī mirī jaañ ga.ī

mujhe yaad aatī hai baabā tirī

ḳhudā mujh ko ab sabr-o-himmat 'atā kar

ki baabā ko mere tū jannat 'atā kar

ho jannat meñ aa'lā maqām un kī qismat

mile un ko har dam ḳhudā terī rahmat

du'ā hai yahī iltijā hai yahī

mujhe yaad aatī hai baabā tirī

mujhe yaad aati hai baba teri

mujhe yaad aati hai baba teri

mere sar ki chhat ab kahan rah gai hai

teri yaad bas ab yahan rah gai hai

aziyyat hain yaadon ko dil mein basana

kahan ab hai hasil mujhe wo zamana

kaTegi kahan ab ye dukh ki ghaDi

mujhe yaad aati hai baba teri

baDe laD se tu ne hum ko tha pala

khilaya hamein apne munh ka niwala

paDi mushkilen to diya sath tu ne

qadam laDkhaDae diya hath tu ne

ki ab to hain ashkon se aankhen bhari

mujhe yaad aati hai baba teri

koi hai yahan aisa koi hai waisa

nahin koi hai mere baba ke jaisa

meri KHwahishon ko yun pura kiya tha

jo manga tha main ne wo la ke diya tha

magar ab to dekho meri bebasi

mujhe yaad aati hai baba teri

achanak tera hath hathon se chhuTa

ki shishe ke manind dil mera TuTa

bataun main kaise ki tha din wo kaisa

qayamat se pahle qayamat ke jaisa

tere sath mein hi meri jaan gai

mujhe yaad aati hai baba teri

KHuda mujh ko ab sabr-o-himmat 'ata kar

ki baba ko mere tu jannat 'ata kar

ho jannat mein aa'la maqam un ki qismat

mile un ko har dam KHuda teri rahmat

du'a hai yahi iltija hai yahi

mujhe yaad aati hai baba teri