‘‘cul-de-sac’’ band gali

zindagī ko roz dete haiñ ḳhirāj

āñsuoñ ko aañkh kī dahlīz par

'arq-e-jism-o-jāñ ko sūraj kī qara'-ambīq meñ

roz rakhte haiñ ubalne ke liye

is qadar masrūf hotī hai hayāt

jis tarah chyūñTī koī halkān zarroñ ke liye

vaqt kī is be-karāñ mañjdhār meñ

ek do lamhe nahīñ milte sañbhalne ke liye

zindagī meñ gunjlak rishtoñ ke jaal

dard-o-ġham ke tānoñ-bānoñ se bane

'umr bhar rahte haiñ chūhoñ kī tarah

ik tag-o-dau meñ katarne ke liye

haiñ 'ajab dastūr is duniyā ke bhī

iltijāoñ ke diye lab kī muñDeroñ par dharo

haath ke pyāle du'āoñ se bharo

kāsa-e-sar meñ lahū rakkho pighalne ke liye

zindagī kī ġhaar ke qaidī haiñ ham

band galiyāñ to bahut haiñ har taraf

maut ke ik chor raste ke sivā ek bhī rasta nahīñ is se nikalne ke liye

zindagi ko roz dete hain KHiraj

aansuon ko aankh ki dahliz par

'arq-e-jism-o-jaan ko suraj ki qara'-ambiq mein

roz rakhte hain ubalne ke liye

is qadar masruf hoti hai hayat

jis tarah chyunTi koi halkan zarron ke liye

waqt ki is be-karan manjdhaar mein

ek do lamhe nahin milte sanbhalne ke liye

zindagi mein gunjlak rishton ke jal

dard-o-gham ke tanon-banon se bane

'umr bhar rahte hain chuhon ki tarah

ek tag-o-dau mein katarne ke liye

hain 'ajab dastur is duniya ke bhi

iltijaon ke diye lab ki munDeron par dharo

hath ke pyale du'aon se bharo

kasa-e-sar mein lahu rakkho pighalne ke liye

zindagi ki ghaar ke qaidi hain hum

band galiyan to bahut hain har taraf

maut ke ek chor raste ke siwa ek bhi rasta nahin is se nikalne ke liye