aaftab

ai āftāb rūh-o-ravān-e-jahāñ hai tū

shīrāza-band daftar-e-kaun-o-makāñ hai tū

baa.is hai tū vajūd-o-adam kī numūd kā

hai sabz tere dam se chaman hast-o-būd kā

qaa.em ye unsuroñ kā tamāshā tujhī se hai

har shai meñ zindagī kā taqāzā tujhī se hai

har shai ko terī jalva-garī se sabāt hai

terā ye soz-o-sāz sarāpā hayāt hai

vo āftāb jis se zamāne meñ nuur hai

dil hai ḳhirad hai rūh-e-ravāñ hai shu.ūr hai

a āftāb ham ko ziyā-e-shu.ūr de

chashm-e-ḳhirad ko apnī tajallī se nuur de

hai mahfil-e-vajūd kā sāmāñ-tarāz to

yazdān-e-sākinān-e-nasheb-o-farāz tū

terā kamāl-e-hastī har jān-dār meñ

terī numūd silsila-e-kohsār meñ

har chiiz kī hayāt kā parvardigār tū

zā.īdgān-e-nūr kā hai tājdār tū

nai ibtidā koī na koī intihā tirī

āzād qaid-e-avval-o-āḳhir ziyā tirī

ai aaftab ruh-o-rawan-e-jahan hai tu

shiraaza-band daftar-e-kaun-o-makan hai tu

bais hai tu wajud-o-adam ki numud ka

hai sabz tere dam se chaman hast-o-bud ka

qaem ye unsuron ka tamasha tujhi se hai

har shai mein zindagi ka taqaza tujhi se hai

har shai ko teri jalwa-gari se sabaat hai

tera ye soz-o-saz sarapa hayat hai

wo aaftab jis se zamane mein nur hai

dil hai KHirad hai ruh-e-rawan hai shuur hai

a aaftab hum ko ziya-e-shuur de

chashm-e-KHirad ko apni tajalli se nur de

hai mahfil-e-wajud ka saman-taraaz to

yazdan-e-sakinan-e-nasheb-o-faraaz tu

tera kamal-e-hasti har jaan-dar mein

teri numud silsila-e-kohsar mein

har chiz ki hayat ka parwardigar tu

zaidgan-e-nur ka hai tajdar tu

nai ibtida koi na koi intiha teri

aazad qaid-e-awwal-o-aKHir ziya teri