holi

ajiib rañg se aa.ī bahār holī meñ

zamīn-e-hind banī lāla-zār holī meñ

bas ab to sar hai kaḌhā.ī meñ pān.cho ghī meñ haiñ

baḌe maze ke haiñ lail-o-nahār holī meñ

har ik hai be-ḳhud-o-sarshār mast-o-dīvāna

baġhair-e-duḳhtar-e-raz hai ḳhumār holī meñ

piye hue haiñ sabhī aaj to mai-e-holī

bahak rahā hai har ik bāda-ḳhvār holī meñ

kisī ko gāliyāñ diiñ aur kisī ko Thoñk diyā

ye chhoḌ rakkhe haiñ kaise bijār holī meñ

bashar kā zikr hī kyā mast dasht-o-sahrā haiñ

ḳhushī se jhūmte haiñ kohsār holī meñ

uchhalte kūdte haiñ nāchte haiñ pī pī kar

ḳhud apne chaak bane haiñ kumhār holī meñ

kahāñ ke sāġhar-o-mīnā kahāñ ke jām-o-subū

tum ok se piyo le ke udhār holī meñ

nasīm-e-mast ke sadqe sharāb ke qurbāñ

lagāte haiñ vo gale baar baar holī meñ

samajh lo apnā hī ghar is ġharīb-ḳhāne ko

balā se gar nahīñ milte kahār holī meñ

kahā jo marte haiñ tum par to hañs ke farmāyā

mareñ tumhāre adū duur paar holī meñ

'zarīf' dekho to kaisī machā.ī hai ūdham

phudak rahe haiñ ye kaise chamār holī meñ

ajib rang se aai bahaar holi mein

zamin-e-hind bani lala-zar holi mein

bas ab to sar hai kaDhai mein pancho ghi mein hain

baDe maze ke hain lail-o-nahaar holi mein

har ek hai be-KHud-o-sarshaar mast-o-diwana

baghair-e-duKHtar-e-raz hai KHumar holi mein

piye hue hain sabhi aaj to mai-e-holi

bahak raha hai har ek baada-KHwar holi mein

kisi ko galiyan din aur kisi ko Thonk diya

ye chhoD rakkhe hain kaise bijar holi mein

bashar ka zikr hi kya mast dasht-o-sahra hain

KHushi se jhumte hain kohsar holi mein

uchhalte kudte hain nachte hain pi pi kar

KHud apne chaak bane hain kumhaar holi mein

kahan ke saghar-o-mina kahan ke jam-o-subu

tum ok se piyo le ke udhaar holi mein

nasim-e-mast ke sadqe sharab ke qurban

lagate hain wo gale bar bar holi mein

samajh lo apna hi ghar is gharib-KHane ko

bala se gar nahin milte kahaar holi mein

kaha jo marte hain tum par to hans ke farmaya

maren tumhaare adu dur par holi mein

'zarif' dekho to kaisi machai hai udham

phudak rahe hain ye kaise chamar holi mein