library mein

siyāh alfāz ke safīne

mirī kitāboñ kī mauj-dar-mauj un sutūr-e-tapāñ se ik gahrī soch ko paar utārte haiñ

siyāh alfāz jo kisī ne

bujhe zamānoñ kī raakh meñ se sulagtī chingāriyāñ samajh kar uThā liye haiñ

ki un kī hiddat se 'asr-e-hāzir kā koī bujhtā alaav dahke

mire navādir

ye jin kā ik ek harf afkār kī jabīnoñ pe tirmirāte 'araq kā qatra

ye harf jo gūñjtī sadā haiñ

ye harf jo māh-o-sāl ke Dher par khaḌe haiñ

yahī to sadiyoñ ke devtā haiñ

ye merī almāriyoñ meñ sadiyoñ purānī tahzīb kā asāsa

hazār sannā' laakh fankār

jin kī kilk-e-guhar se qirtās-e-rūh par vo nuqūsh ubhre

jo jāvedāñ haiñ

hazār sadiyoñ kī dāstāñ haiñ

bujhe zamānoñ kī raakh se ye sulagtī chingāriyāñ uThā kar

tavīl tārīkiyoñ meñ ham aaj chal rahe haiñ

tavīl tārīkiyoñ meñ kho jā.eñge ham ik din

to apnī nok-e-qalam se Tapke hue fasāne

ḳhalāoñ meñ phail jā.eñge sad hazār sadiyoñ kī guuñj ban kar

ye harf jo gūñjtī sadā haiñ

yahī to sadiyoñ ke devtā haiñ

siyah alfaz ke safine

meri kitabon ki mauj-dar-mauj un sutur-e-tapan se ek gahri soch ko par utarte hain

siyah alfaz jo kisi ne

bujhe zamanon ki rakh mein se sulagti chingariyan samajh kar uTha liye hain

ki un ki hiddat se 'asr-e-hazir ka koi bujhta alaw dahke

mere nawadir

ye jin ka ek ek harf afkar ki jabinon pe tirmiraate 'araq ka qatra

ye harf jo gunjti sada hain

ye harf jo mah-o-sal ke Dher par khaDe hain

yahi to sadiyon ke dewta hain

ye meri almariyon mein sadiyon purani tahzib ka asasa

hazar sanna' lakh fankar

jin ki kilk-e-guhar se qirtas-e-ruh par wo nuqush ubhre

jo jawedan hain

hazar sadiyon ki dastan hain

bujhe zamanon ki rakh se ye sulagti chingariyan uTha kar

tawil tarikiyon mein hum aaj chal rahe hain

tawil tarikiyon mein kho jaenge hum ek din

to apni nok-e-qalam se Tapke hue fasane

KHalaon mein phail jaenge sad hazar sadiyon ki gunj ban kar

ye harf jo gunjti sada hain

yahi to sadiyon ke dewta hain