sham-e-hilal-e-eid

chāñd niklā hai ba-andāz-e-digar aaj kī shaam

bārish-e-nūr hai tā-hadd-e-nazar aaj kī shaam

zindagī nuur kī āġhosh meñ hai jalva-numā

kitnā masrūr hai har ek bashar aaj kī shaam

yuuñ to hotī hai haqīqat meñ har ik shaam hasīñ

rahmatoñ barkatoñ vaalī hai magar aaj kī shaam

misl-e-ḳhurshīd jabīnoñ pe haiñ sajdoñ ke nishāñ

qalb-e-momin huā mānind-e-qamar aaj kī shaam

haiñ ziyā-bār mohabbat ke sabhī naqsh-o-nigār

dil kī duniyā hai bahāroñ kā nagar aaj kī shaam

sūrat-e-kāhkashāñ ho ga.ī har rāhguzar

zarra zarra nazar aatā hai guhar aaj kī shaam

ahl-e-zar hī nahīñ muflis bhī haiñ shādāñ shādāñ

ġham-nasīboñ ko milā ġham se mafar aaj kī shaam

gulshan-e-dil meñ mahakte haiñ masarrat ke gulāb

le ke aa.ī hai mohabbat kī sahar aaj kī shaam

nāzish-e-rang-e-bahārāñ hai har ik nazzāra

kitnā rangīn hai andāz-e-nazar aaj kī shaam

chand nikla hai ba-andaz-e-digar aaj ki sham

barish-e-nur hai ta-hadd-e-nazar aaj ki sham

zindagi nur ki aaghosh mein hai jalwa-numa

kitna masrur hai har ek bashar aaj ki sham

yun to hoti hai haqiqat mein har ek sham hasin

rahmaton barkaton wali hai magar aaj ki sham

misl-e-KHurshid jabinon pe hain sajdon ke nishan

qalb-e-momin hua manind-e-qamar aaj ki sham

hain ziya-bar mohabbat ke sabhi naqsh-o-nigar

dil ki duniya hai bahaaron ka nagar aaj ki sham

surat-e-kahkashan ho gai har rahguzar

zarra zarra nazar aata hai guhar aaj ki sham

ahl-e-zar hi nahin muflis bhi hain shadan shadan

gham-nasibon ko mila gham se mafar aaj ki sham

gulshan-e-dil mein mahakte hain masarrat ke gulab

le ke aai hai mohabbat ki sahar aaj ki sham

nazish-e-rang-e-bahaaran hai har ek nazzara

kitna rangin hai andaz-e-nazar aaj ki sham