id ka dukh

ye mirī pahlī iid hai jis meñ

tū nahīñ hai to soch kar tujh ko

maiñ tirī yaad se milā huuñ gale

vo sukūñ-baḳhsh chhāñv ḳhvāb huī

jo kaḌī dhuup meñ mayassar thī

terī chhitnār shaḳhsiyat ke tale

dost ahbāb rashk karte the

terī bharpūr parvarish ke tufail

ham bahan bhaa.ī jis tarah se pale

terā ehsān hai ki tū ne hameñ

ilm-o-irfāñ se ham-kanār kiyā

ik dar-e-āgahī ko vā kar ke

rāz-e-hastī ko āshkār kiyā

aañkh pur-nam hai muzmahil hai dimāġh

dekh kar tere zauq kā iz.hār

zard lāThī qarāqalī Topī

garm loī kutub kī almārī

dil pareshāñ hai dekh kar terī

surma.ī wasket siyah pā-posh

jo tirī qurbatoñ meñ hāsil thā

ab kahāñ iid kā vo josh-o-ḳharosh

aisā ḳhush-baḳht shaḳhs hogā koī

jis kī aulād us pe naaz kare

hai duā dil se us jahān meñ bhī

rab tujhe aur sarfarāz kare

ye meri pahli id hai jis mein

tu nahin hai to soch kar tujh ko

main teri yaad se mila hun gale

wo sukun-baKHsh chhanw KHwab hui

jo kaDi dhup mein mayassar thi

teri chhitnar shaKHsiyat ke tale

dost ahbab rashk karte the

teri bharpur parwarish ke tufail

hum bahan bhai jis tarah se pale

tera ehsan hai ki tu ne hamein

ilm-o-irfan se ham-kanar kiya

ek dar-e-agahi ko wa kar ke

raaz-e-hasti ko aashkar kiya

aankh pur-nam hai muzmahil hai dimagh

dekh kar tere zauq ka izhaar

zard laThi qaraqali Topi

garm loi kutub ki almari

dil pareshan hai dekh kar teri

surmai wasket siyah pa-posh

jo teri qurbaton mein hasil tha

ab kahan id ka wo josh-o-KHarosh

aisa KHush-baKHt shaKHs hoga koi

jis ki aulad us pe naz kare

hai dua dil se us jahan mein bhi

rab tujhe aur sarfaraaz kare