id

chāñd jab iid kā nazar aayā

haal kyā pūchhte ho ḳhushiyoñ kā

āsmāñ par havā.iyāñ chhūTīñ

naubateñ masjidoñ meñ bajne lagīñ

shukr sab ḳhās-o-ām karne lage

aur bāham salām karne lage

nanhe bachche haiñ ḳhaas kar masrūr

kahte haiñ iid ab hai kitnī duur

maa.eñ kahtī haiñ kuchh nahīñ ab duur

sub.h aa jā.egī yahāñ pe zarūr

aao khā pī ke so raho chup chaap

aa.egī iid sub.h āpī-āp

bachchoñ kī aañkh meñ hai niiñd kahāñ

haiñ unheñ to chaḌhī huī ḳhushiyāñ

ho ga.ī raat kāTnī mushkil

kal ke din par lagā huā hai dil

bachchiyoñ ne lagā.ī hai mehñdī

rangyālī mañgā.ī hai mehñdī

achchhe achchhe banā.e haiñ kapḌe

sab na.e sil ke aa.e haiñ kapḌe

bachche be-e'tibār aise haiñ

un ko rakh kar sirhāne so.e haiñ

aa ga.ī niiñd so ga.e bachche

baare ḳhāmosh ho ga.e bachche

ḳhvāb bhī iid hī ke aate haiñ

sote se uTh ke baiTh jaate haiñ

sub.h-e-sādiq kā ho gayā hai zuhūr

saarī duniyā pe chhā gayā ik nuur

chiḌiyāñ peḌoñ pe chahchahāne lagīñ

iid ke giit mil ke gaane lagīñ

sharq par jalva-gar huā sūraj

aaj hai kuchh nayā nayā sūraj

taaj ḳhuub us ne aaj pahnā hai

surḳh kirnoñ kā taaj pahnā hai

har musalmān bāġh-bāġh hai aaj

āsmāñ par har ik dimāġh hai aaj

sub.h uThte hī sab ne ġhusl kiyā

pahnā ujlā libās itr malā

maa.eñ nahlā rahī haiñ bachchoñ ko

ḳhuub bahlā rahī haiñ bachchoñ ko

bachche ḳhush hoñ yahī hai saarī iid

un ke bachchoñ kī iid un kī iid

bachchiyoñ ne bhī sar guñdhāyā hai

maaoñ ne ḳhuub unheñ sajāyā hai

joḌe rañgīn sab ne pahne haiñ

chāñdī sone ke saare gahne haiñ

oḌhnī par Tikā huā goTā

dekhnā hai damak rahā kaisā

bhā.iyoñ ko bulātī phirtī haiñ

apne kapḌe dikhātī phirtī haiñ

haath mehñdī rañge dikhātī haiñ

ḳhush haiñ hañstī haiñ khilkhilātī haiñ

aur laḌke bhī ho ga.e tayyār

sar pe bāñdhī hai laT-paTī dastār

ḳhushnumā sab ne suiT pahne haiñ

aur pairoñ meñ boot pahne haiñ

kiyā jhuk kar salām maaoñ ko

baap dādoñ ko aur chachāoñ ko

sab se paise jhagaḌ jhagaḌ ke liye

ruuTh kar zid se aur aḌ ke liye

haath meñ lakḌī jeb meñ rūmāl

chalte phirte haiñ kyā Thumaktī chaal

ho chukī ab to ḳhuub tayyārī

aur seva.iyoñ kī aa ga.ī baarī

farsh par bichh gayā hai dastarḳhvān

mil ke baiThe haiñ bachche būḌhe javān

sāmne hai bharī huī thālī

haiñ sivayyāñ bhī ḳhuub rūmālī

ḳhuub khāte haiñ aur khilāte haiñ

yuuñ ḳhushī iid kī manāte haiñ

log sab iid paḌh ke nikle haiñ

goyā parvān chaḌh ke nikle haiñ

ḳhush haiñ sab aur karte haiñ ḳhairāt

lūTte haiñ savāb hāthoñ haat

jaan pahchān milte haiñ aksar

iid milte haiñ sab gale mil kar

bachche-bāle bhī saath haiñ saare

jo ki haiñ iid dekhne aa.e

un ko melā dikhāte phirte haiñ

chīzyāñ bhī khilāte phirte haiñ

bachche laTTū hue khilaunoñ par

vo bhī jholī meñ rakh liye le kar

kyoñ na ho khel kā yahī sin hai

aur phir aaj iid kā din hai

chand jab id ka nazar aaya

haal kya puchhte ho KHushiyon ka

aasman par hawaiyan chhuTin

naubaten masjidon mein bajne lagin

shukr sab KHas-o-am karne lage

aur baham salam karne lage

nanhe bachche hain KHas kar masrur

kahte hain id ab hai kitni dur

maen kahti hain kuchh nahin ab dur

subh aa jaegi yahan pe zarur

aao kha pi ke so raho chup chap

aaegi id subh aapi-ap

bachchon ki aankh mein hai nind kahan

hain unhen to chaDhi hui KHushiyan

ho gai raat kaTni mushkil

kal ke din par laga hua hai dil

bachchiyon ne lagai hai mehndi

rangyali mangai hai mehndi

achchhe achchhe banae hain kapDe

sab nae sil ke aae hain kapDe

bachche be-e'tibar aise hain

un ko rakh kar sirhane soe hain

aa gai nind so gae bachche

bare KHamosh ho gae bachche

KHwab bhi id hi ke aate hain

sote se uTh ke baiTh jate hain

subh-e-sadiq ka ho gaya hai zuhur

sari duniya pe chha gaya ek nur

chiDiyan peDon pe chahchahane lagin

id ke git mil ke gane lagin

sharq par jalwa-gar hua suraj

aaj hai kuchh naya naya suraj

taj KHub us ne aaj pahna hai

surKH kirnon ka taj pahna hai

har musalman bagh-bagh hai aaj

aasman par har ek dimagh hai aaj

subh uThte hi sab ne ghusl kiya

pahna ujla libas itr mala

maen nahla rahi hain bachchon ko

KHub bahla rahi hain bachchon ko

bachche KHush hon yahi hai sari id

un ke bachchon ki id un ki id

bachchiyon ne bhi sar gundhaya hai

maon ne KHub unhen sajaya hai

joDe rangin sab ne pahne hain

chandi sone ke sare gahne hain

oDhni par Tika hua goTa

dekhna hai damak raha kaisa

bhaiyon ko bulati phirti hain

apne kapDe dikhati phirti hain

hath mehndi range dikhati hain

KHush hain hansti hain khilkhilati hain

aur laDke bhi ho gae tayyar

sar pe bandhi hai laT-paTi dastar

KHushnuma sab ne suiT pahne hain

aur pairon mein boot pahne hain

kiya jhuk kar salam maon ko

bap dadon ko aur chachaon ko

sab se paise jhagaD jhagaD ke liye

ruTh kar zid se aur aD ke liye

hath mein lakDi jeb mein rumal

chalte phirte hain kya Thumakti chaal

ho chuki ab to KHub tayyari

aur sewaiyon ki aa gai bari

farsh par bichh gaya hai dastarKHwan

mil ke baiThe hain bachche buDhe jawan

samne hai bhari hui thaali

hain siwayyan bhi KHub rumali

KHub khate hain aur khilate hain

yun KHushi id ki manate hain

log sab id paDh ke nikle hain

goya parwan chaDh ke nikle hain

KHush hain sab aur karte hain KHairaat

luTte hain sawab hathon hat

jaan pahchan milte hain aksar

id milte hain sab gale mil kar

bachche-baale bhi sath hain sare

jo ki hain id dekhne aae

un ko mela dikhate phirte hain

chizyan bhi khilate phirte hain

bachche laTTu hue khilaunon par

wo bhi jholi mein rakh liye le kar

kyon na ho khel ka yahi sin hai

aur phir aaj id ka din hai