walid ki wafat par

tumhārī qabr par

maiñ fātiha paḌhne nahīñ aayā

mujhe mālūm thā

tum mar nahīñ sakte

tumhārī maut kī sachchī ḳhabar jis ne uḌaa.ī thī

vo jhūTā thā

vo tum kab the

koī sūkhā huā patta havā se mil ke TuuTā thā

mirī āñkheñ

tumhāre manzaroñ meñ qaid haiñ ab tak

maiñ jo bhī dekhtā huuñ

sochtā huuñ

vo vahī hai

jo tumhārī nek-nāmī aur bad-nāmī kī duniyā thī

kahīñ kuchh bhī nahīñ badlā

tumhāre haath merī uñgliyoñ meñ saañs lete haiñ

maiñ likhne ke liye

jab bhī qalam kāġhaz uThātā huuñ

tumheñ baiThā huā maiñ apnī hī kursī meñ paatā huuñ

badan meñ mere jitnā bhī lahū hai

vo tumhārī

laġhzishoñ nākāmiyoñ ke saath bahtā hai

mirī āvāz meñ chhup kar

tumhārā zehn rahtā hai

mirī bīmāriyoñ meñ tum

mirī lāchāriyoñ meñ tum

tumhārī qabr par jis ne tumhārā naam likhā hai

vo jhūTā hai

tumhārī qabr meñ maiñ dafn huuñ

tum mujh meñ zinda ho

kabhī fursat mile to fātiha paḌhne chale aanā

tumhaari qabr par

main fatiha paDhne nahin aaya

mujhe malum tha

tum mar nahin sakte

tumhaari maut ki sachchi KHabar jis ne uDai thi

wo jhuTa tha

wo tum kab the

koi sukha hua patta hawa se mil ke TuTa tha

meri aankhen

tumhaare manzaron mein qaid hain ab tak

main jo bhi dekhta hun

sochta hun

wo wahi hai

jo tumhaari nek-nami aur bad-nami ki duniya thi

kahin kuchh bhi nahin badla

tumhaare hath meri ungliyon mein sans lete hain

main likhne ke liye

jab bhi qalam kaghaz uThata hun

tumhein baiTha hua main apni hi kursi mein pata hun

badan mein mere jitna bhi lahu hai

wo tumhaari

laghzishon nakaamiyon ke sath bahta hai

meri aawaz mein chhup kar

tumhaara zehn rahta hai

meri bimariyon mein tum

meri lachaariyon mein tum

tumhaari qabr par jis ne tumhaara nam likha hai

wo jhuTa hai

tumhaari qabr mein main dafn hun

tum mujh mein zinda ho

kabhi fursat mile to fatiha paDhne chale aana