bahaar

gulshan-e-ālam meñ jab tashrīf laatī hai bahār

rañg-o-bū ke husn kyā kyā kuchh dikhātī hai bahār

sub.h ko lā kar nasīm dil-kushā har shāḳh par

tāza-tar kis kis tarah ke gul khilātī hai bahār

naunihāloñ kī dikhā kar dam-ba-dam nashv-o-numā

jism meñ rūh-e-ravāñ kyā kyā baḌhātī hai bahār

bulbuleñ chahkārtī haiñ shāḳh-e-gul par jā-ba-jā

bulbuleñ kyā fil-haqīqat chahchahātī hai bahār

hauz-o-favvāroñ ko de kar aabrū phir lutf se

kyā mo.attar farsh sabze kā bichhātī hai bahār

jumbish-e-bād-e-sabā se ho ke ham-dosh-e-nashāt

saath har sabze ke kyā kyā lahlahātī hai bahār

ḳhalq ko har lahza apne husn kī rañgat dikhā

be-takalluf kyā hī har dil meñ samātī hai bahār

majma.a-e-ḳhūbāñ hujūm-e-āshiqāñ aur josh-e-gul

dekh in rañgoñ ko kyā kyā khilkhilātī hai bahār

gul-ruḳhoñ kī dekh kar gul-bāziyāñ har dam nazīr

gul idhar ḳhandāñ udhar dhūmeñ machātī hai bahār

gulshan-e-alam mein jab tashrif lati hai bahaar

rang-o-bu ke husn kya kya kuchh dikhati hai bahaar

subh ko la kar nasim dil-kusha har shaKH par

taza-tar kis kis tarah ke gul khilati hai bahaar

naunihaalon ki dikha kar dam-ba-dam nashw-o-numa

jism mein ruh-e-rawan kya kya baDhati hai bahaar

bulbulen chahkarti hain shaKH-e-gul par ja-ba-ja

bulbulen kya fil-haqiqat chahchahati hai bahaar

hauz-o-fawwaron ko de kar aabru phir lutf se

kya moattar farsh sabze ka bichhati hai bahaar

jumbish-e-baad-e-saba se ho ke ham-dosh-e-nashat

sath har sabze ke kya kya lahlahati hai bahaar

KHalq ko har lahza apne husn ki rangat dikha

be-takalluf kya hi har dil mein samati hai bahaar

majma-e-KHuban hujum-e-ashiqan aur josh-e-gul

dekh in rangon ko kya kya khilkhilati hai bahaar

gul-ruKHon ki dekh kar gul-baziyan har dam nazir

gul idhar KHandan udhar dhumen machati hai bahaar