zamin ki aaKHri sada

duniyā thak chukī hai

zamīn kī sāñseñ ukhaḌ ga.ī haiñ

fazā meñ koī maddham sī fuġhāñ sunā.ī detī hai

aur havā jo kabhī ḳhushbuoñ kī paiġhāmbar thī

ab bārūd kī bū se labrez hai

shahr añdheroñ meñ Dūbte jā rahe haiñ

raushniyoñ ke mīnār ab mātam karte haiñ

galiyoñ meñ dauḌte bachche āñkhoñ meñ ḳhvāb nahīñ

ḳhauf kī parchhā.iyāñ liye bhāgte haiñ

qalam ruk ga.e haiñ

lafz bojhal ho chuke haiñ

sadāqat ke qāfile luT ga.e

aur sachchā.ī ke diip bujhte chale ga.e

har taraf chīḳhoñ kā ek an-dekhe zaḳhm kī tarah phailtā shor hai

jahāñ koī kisī kī sadā par palaT kar nahīñ dekhtā

jahāñ rishte ḳharīde jaate haiñ

jahāñ ḳhulūs nīlām ho chukā hai

duniyā kī mez par saude-bāzī ho rahī hai

amn kī boliyāñ lag rahī haiñ

insāniyat kī qīmat

ab tel aslaha aur siyāsat ke kāġhazoñ meñ tai hotī hai

band darvāzoñ ke pīchhe faisle hote haiñ

aur khule maidānoñ meñ lāsheñ girtī haiñ

jinheñ jiinā thā vo dafn ho chuke

jinheñ mar jaanā thā vo eqtidār kī kursī par baiThe haiñ

kabhī zamīn ko fasloñ se mahkāyā jaatā thā

ab lāshoñ se bharā jā rahā hai

kabhī pāniyoñ par mohabbat ke diye bahte the

ab nafrat kī kashtiyāñ Duub rahī haiñ

maa.eñ du'ā kartī haiñ

ki un ke bachche jang ke sipāhī na baneñ

ki un ke gharoñ meñ bambārī kī bārish na ho

ki un ke ḳhvāb mahfūz raheñ

magar vaqt bahrā ho chukā hai

du'ā kī sadā dīvāroñ se Takrā kar lauT aatī hai

ye duniyā

ab apnī kahānī kā iḳhtitām ḳhud likh rahī hai

ḳhuun se āñsuoñ se

aur hasratoñ kī ujḌī huī raushnā.ī se

kaash koī phir se

in zaḳhmoñ par mohabbat kā marham rakh de

kaash koī phir se

in vīrān rāstoñ par zindagī kī ḳhushbū bikher de

kaash

koī phir se

duniyā ko insāniyat kā sabaq yaad karā de

duniyā thak chukī hai duniyā thak chukī hai

duniya thak chuki hai

zamin ki sansen ukhaD gai hain

faza mein koi maddham si fughan sunai deti hai

aur hawa jo kabhi KHushbuon ki paighambar thi

ab barud ki bu se labrez hai

shahr andheron mein Dubte ja rahe hain

raushniyon ke minar ab matam karte hain

galiyon mein dauDte bachche aankhon mein KHwab nahin

KHauf ki parchhaiyan liye bhagte hain

qalam ruk gae hain

lafz bojhal ho chuke hain

sadaqat ke qafile luT gae

aur sachchai ke dip bujhte chale gae

har taraf chiKHon ka ek an-dekhe zaKHm ki tarah phailta shor hai

jahan koi kisi ki sada par palaT kar nahin dekhta

jahan rishte KHaride jate hain

jahan KHulus nilam ho chuka hai

duniya ki mez par saude-bazi ho rahi hai

amn ki boliyan lag rahi hain

insaniyat ki qimat

ab tel aslaha aur siyasat ke kaghazon mein tai hoti hai

band darwazon ke pichhe faisle hote hain

aur khule maidanon mein lashen girti hain

jinhen jina tha wo dafn ho chuke

jinhen mar jaana tha wo eqtidar ki kursi par baiThe hain

kabhi zamin ko faslon se mahkaya jata tha

ab lashon se bhara ja raha hai

kabhi paniyon par mohabbat ke diye bahte the

ab nafrat ki kashtiyan Dub rahi hain

maen du'a karti hain

ki un ke bachche jang ke sipahi na banen

ki un ke gharon mein bambari ki barish na ho

ki un ke KHwab mahfuz rahen

magar waqt bahra ho chuka hai

du'a ki sada diwaron se Takra kar lauT aati hai

ye duniya

ab apni kahani ka iKHtitam KHud likh rahi hai

KHun se aansuon se

aur hasraton ki ujDi hui raushnai se

kash koi phir se

in zaKHmon par mohabbat ka marham rakh de

kash koi phir se

in viran raston par zindagi ki KHushbu bikher de

kash

koi phir se

duniya ko insaniyat ka sabaq yaad kara de

duniya thak chuki hai duniya thak chuki hai