main shair kab hun

maiñ shā'ir kab huuñ

maiñ to mahaz ik ḳhvāb huuñ bikhrā huā sā

ik ḳhāmushī kī shāḳh pe Thahrā huā sā

ik be-sadā lamha jo bole to TuuT jaa.e

ik aa.ine jaisā jo dekhe to chhūT jaa.e

maiñ shā'ir kab huuñ

maiñ to lafzoñ ke biij bo na sakā

ḳhayāloñ ke khet meñ so na sakā

maiñ to ehsās kā vo pyāsā huuñ

jo jazboñ kī nahr bhī pī le

phir bhī sairāb na ho paa.e

maiñ shā'ir kab huuñ

maiñ to bārish kī buuñd jaisā huuñ

jo miTTī se baat kartā hai

phir ḳhud hī miTTī meñ kho jaatā hai

maiñ to jugnū sā ik purānā ḳhayāl huuñ

jo raat ke āñchal meñ TimTimātā hai

maiñ shā'ir kab huuñ

mere misre' adhūre haiñ

'merī bahreñ baġhāvat kartī haiñ

mere qāfiye chhup jaate haiñ

jab maiñ dard ko pukārne lagtā huuñ

maiñ shā'ir kab huuñ

maiñ to ik tanhā galī kā charāġh huuñ

jo havā se laraztā hai

magar bujhne se inkār kartā hai

maiñ to vo ḳhat huuñ jo bhejā na gayā

par jazbāt se likkhā gayā

maiñ shā'ir kab huuñ

mere ash'ār meñ hunar nahīñ

bas zaḳhmoñ kī āvāz hai

mere alfāz meñ zor nahīñ

bas dil ke kuchh raaz haiñ

maiñ shā'ir kab huuñ

maiñ to ḳhvāboñ kā dariyā huuñ

jis meñ tamsīleñ bahtī haiñ

jis kī maujeñ kabhī sach kabhī fasāna kahtī haiñ

maiñ shā'ir kab huuñ

maiñ to 'sāġhar' huuñ

jo lafzoñ kī talāsh meñ bhaTkā hai

jo ḳhayāloñ kī rāhoñ meñ rukā hai

jo har nazm meñ ḳhud se milā hai

phir bhī ḳhud ko na pā sakā hai

main sha'ir kab hun

main to mahaz ek KHwab hun bikhra hua sa

ek KHamushi ki shaKH pe Thahra hua sa

ek be-sada lamha jo bole to TuT jae

ek aaine jaisa jo dekhe to chhuT jae

main sha'ir kab hun

main to lafzon ke bij bo na saka

KHayalon ke khet mein so na saka

main to ehsas ka wo pyasa hun

jo jazbon ki nahr bhi pi le

phir bhi sairab na ho pae

main sha'ir kab hun

main to barish ki bund jaisa hun

jo miTTi se baat karta hai

phir KHud hi miTTi mein kho jata hai

main to jugnu sa ek purana KHayal hun

jo raat ke aanchal mein TimTimata hai

main sha'ir kab hun

mere misre' adhure hain

'meri bahren baghawat karti hain

mere qafiye chhup jate hain

jab main dard ko pukarne lagta hun

main sha'ir kab hun

main to ek tanha gali ka charagh hun

jo hawa se larazta hai

magar bujhne se inkar karta hai

main to wo KHat hun jo bheja na gaya

par jazbaat se likkha gaya

main sha'ir kab hun

mere ash'ar mein hunar nahin

bas zaKHmon ki aawaz hai

mere alfaz mein zor nahin

bas dil ke kuchh raaz hain

main sha'ir kab hun

main to KHwabon ka dariya hun

jis mein tamsilen bahti hain

jis ki maujen kabhi sach kabhi fasana kahti hain

main sha'ir kab hun

main to 'saghar' hun

jo lafzon ki talash mein bhaTka hai

jo KHayalon ki rahon mein ruka hai

jo har nazm mein KHud se mila hai

phir bhi KHud ko na pa saka hai