jab ham-kalam humse hota hai pan kha kar

jab ham-kalām ham se hotā hai paan khā kar

kis rañg se kare hai bāteñ chabā chabā kar

thī jumlā-tan latāfat aalam meñ jaañ ke ham to

miTTī meñ aT ga.e haiñ is ḳhāk-dāñ meñ aa kar

sa.ī o talab bahut kī matlab ke ta.iiñ na pahuñche

nā-chār ab jahāñ se baiThe haiñ haath uThā kar

ġhairat ye thī ki aayā us se jo maiñ ḳhafā ho

marte muā pe hargiz ūdhar phirā na jā kar

qudrat ḳhudā kī sab meñ ḳhal.ul-īzār aao

baiTho jo mujh kane to parde meñ muñh chhupā kar

armān hai jinhoñ ko ve ab kareñ mohabbat

ham to hue pashīmāñ dil ke ta.iiñ lagā kar

maiñ 'mīr' tark le kar duniyā se haath uThāyā

darvesh tū bhī to hai haq meñ mire duā kar

jab ham-kalam hum se hota hai pan kha kar

kis rang se kare hai baaten chaba chaba kar

thi jumla-tan latafat aalam mein jaan ke hum to

miTTi mein aT gae hain is KHak-dan mein aa kar

sai o talab bahut ki matlab ke tain na pahunche

na-chaar ab jahan se baiThe hain hath uTha kar

ghairat ye thi ki aaya us se jo main KHafa ho

marte mua pe hargiz udhar phira na ja kar

qudrat KHuda ki sab mein KHalul-izar aao

baiTho jo mujh kane to parde mein munh chhupa kar

arman hai jinhon ko we ab karen mohabbat

hum to hue pashiman dil ke tain laga kar

main 'mir' tark le kar duniya se hath uThaya

darwesh tu bhi to hai haq mein mere dua kar