nanhe paTelu ki shaiKHiyan

sunātā huuñ tumheñ ai bhā.iyo maiñ

ki andar mere kyā jauhar chhupe haiñ

bahādur huuñ maiñ duniyā meñ akelā

mirā madd-e-muqābil kaun hogā

pahalvāñ mujh se har ik Dar gayā hai

mirī tāqat kā sikka chal rahā hai

agar rustam bhī merā naam sun le

to maare ḳhauf ke bāhar na nikle

agar maiñ jang ke maidāñ meñ jā.ūñ

to saarī makkhiyoñ ke sar uḌā.ūñ

agar aa.egī billī sāmne to

do-lattā maar ke chhoḌūñgā us ko

jo chiḌiyā haath aa jaa.e kahīñ se

to sar us kā judā kar duuñ chhurī se

zahe-qismat diyā murġhī ne anDā

to maiñ ne us ko toḌā le ke DañDā

agar machchhar ko mukkā ek mārūñ

to fauran ḳhaak meñ us ko milā duuñ

kaho to murġh kī gardan maroḌūñ

na hargiz vo kahegā kukḌūñ kukḌūñ

ġharaz mujh meñ hai tāqat itnī bhārī

samajh meñ jo na aa.egī tumhārī

sunata hun tumhein ai bhaiyo main

ki andar mere kya jauhar chhupe hain

bahadur hun main duniya mein akela

mera madd-e-muqabil kaun hoga

pahalwan mujh se har ek Dar gaya hai

meri taqat ka sikka chal raha hai

agar rustam bhi mera nam sun le

to mare KHauf ke bahar na nikle

agar main jang ke maidan mein jaun

to sari makkhiyon ke sar uDaun

agar aaegi billi samne to

do-latta mar ke chhoDunga us ko

jo chiDiya hath aa jae kahin se

to sar us ka juda kar dun chhuri se

zahe-qismat diya murghi ne anDa

to main ne us ko toDa le ke DanDa

agar machchhar ko mukka ek marun

to fauran KHak mein us ko mila dun

kaho to murgh ki gardan maroDun

na hargiz wo kahega kukDun kukDun

gharaz mujh mein hai taqat itni bhaari

samajh mein jo na aaegi tumhaari