main shikar hun kisi aur ka mujhe marta koi aur hai

maiñ shikār huuñ kisī aur kā mujhe mārtā koī aur hai

mujhe jis ne bakrī banā diyā vo to bheḌiyā koī aur hai

ka.ī sardiyāñ bhī guzar ga.iiñ maiñ to us ke kaam na aa sakā

maiñ lihāf huuñ kisī aur kā mujhe oḌhtā koī aur hai

mujhe chakkaroñ meñ phañsā diyā mujhe ishq ne to rulā diyā

maiñ to maañg thī kisī aur kī mujhe māñgtā koī aur hai

maiñ Tañgā rahā thā muñDer par ki kabhī to aa.egā sehn meñ

maiñ thā muntazir kisī aur kā mujhe ghūrtā koī aur hai

sar-e-bazm mujh ko uThā diyā mujhe maar maar liTā diyā

mujhe mārtā koī aur hai vale hāñptā koī aur hai

mujhe apnī biivī pe faḳhr hai mujhe apne saale pe naaz hai

nahīñ dosh donoñ kā is meñ kuchh mujhe DāñTtā koī aur hai

maiñ to pheñT pheñT ke phaT gayā maiñ phaTā huā vahī taash huuñ

mujhe kheltā koī aur hai mujhe pheñTtā koī aur hai

mire rob meñ to vo aa gayā mire sāmne to vo jhuk gayā

mujhe laat khā ke huī ḳhabar mujhe pīTtā koī aur hai

hai ajab nizām zakāt kā mire mulk meñ mire des meñ

ise kāTtā koī aur hai ise bāñTtā koī aur hai

jo garajte hoñ vo baraste hoñ kabhī aisā ham ne sunā nahīñ

yahāñ bhūñktā koī aur hai yahāñ kāTtā koī aur hai

ajab aadmī hai ye 'qāsmī' ise be-qusūr hī jāniye

ye to Dākiyā hai janāb-e-man ise bhejtā koī aur hai

main shikar hun kisi aur ka mujhe marta koi aur hai

mujhe jis ne bakri bana diya wo to bheDiya koi aur hai

kai sardiyan bhi guzar gain main to us ke kaam na aa saka

main lihaf hun kisi aur ka mujhe oDhta koi aur hai

mujhe chakkaron mein phansa diya mujhe ishq ne to rula diya

main to mang thi kisi aur ki mujhe mangta koi aur hai

main Tanga raha tha munDer par ki kabhi to aaega sehn mein

main tha muntazir kisi aur ka mujhe ghurta koi aur hai

sar-e-bazm mujh ko uTha diya mujhe mar mar liTa diya

mujhe marta koi aur hai wale hanpta koi aur hai

mujhe apni biwi pe faKHr hai mujhe apne sale pe naz hai

nahin dosh donon ka is mein kuchh mujhe DanTta koi aur hai

main to phenT phenT ke phaT gaya main phaTa hua wahi tash hun

mujhe khelta koi aur hai mujhe phenTta koi aur hai

mere rob mein to wo aa gaya mere samne to wo jhuk gaya

mujhe lat kha ke hui KHabar mujhe piTta koi aur hai

hai ajab nizam zakat ka mere mulk mein mere des mein

ise kaTta koi aur hai ise banTta koi aur hai

jo garajte hon wo baraste hon kabhi aisa hum ne suna nahin

yahan bhunkta koi aur hai yahan kaTta koi aur hai

ajab aadmi hai ye 'qasmi' ise be-qusur hi jaaniye

ye to Dakiya hai janab-e-man ise bhejta koi aur hai