roTiyan

kamyāb ho ga.iiñ jo zahānat kī roTiyāñ

khāne lage haiñ log jahālat kī roTiyāñ

mehnat se jin ko aar hai vo bhiik maañg kar

din-rāt toḌte haiñ saḳhāvat kī roTiyāñ

khā to rahe ho dekhnā pachhtāoge ik din

hotī nahīñ haiñ hazm adāvat kī roTiyāñ

leader hamāre bāhamī nafrat kī aag par

jab señk chuke gandī siyāsat kī roTiyāñ

ab aarzī fat.h pe nadīdoñ ko dekhiye

itrā ke khā rahe haiñ himāqat kī roTiyāñ

kuttoñ ko khilā.enge mohabbat kī ġhizā.eñ

mehmāñ ko khilāte haiñ hiqārat kī roTiyāñ

charbī ghaTā leñ apnī sehat-mand aurteñ

parhez meñ khātī haiñ nazākat kī roTiyāñ

ghar ke kitchen kā buzurgo rakhnā zarā ḳhayāl

dekho vahāñ pakeñ na baġhāvat kī roTiyāñ

aql-e-kul hī jinheñ chhū kar nahīñ ga.ī

bāñTo na un meñ fahm-o-farāsat kī roTiyāñ

insāñ ko satā.egī sadā bhuuk havas kī

jab tak na mayassar hoñ qanā.at kī roTiyāñ

merī sehat kā raaz bas itnā hai 'ḳhvāh-maḳhvāh'

khātā huuñ roz tanz-o-zarāfat kī roTiyāñ

kamyab ho gain jo zahanat ki roTiyan

khane lage hain log jahaalat ki roTiyan

mehnat se jin ko aar hai wo bhik mang kar

din-raat toDte hain saKHawat ki roTiyan

kha to rahe ho dekhna pachhtaoge ek din

hoti nahin hain hazm adawat ki roTiyan

leader hamare bahami nafrat ki aag par

jab senk chuke gandi siyasat ki roTiyan

ab aarzi fath pe nadidon ko dekhiye

itra ke kha rahe hain himaqat ki roTiyan

kutton ko khilaenge mohabbat ki ghizaen

mehman ko khilate hain hiqarat ki roTiyan

charbi ghaTa len apni sehat-mand aurten

parhez mein khati hain nazakat ki roTiyan

ghar ke kitchen ka buzurgo rakhna zara KHayal

dekho wahan paken na baghawat ki roTiyan

aql-e-kul hi jinhen chhu kar nahin gai

banTo na un mein fahm-o-farasat ki roTiyan

insan ko sataegi sada bhuk hawas ki

jab tak na mayassar hon qanaat ki roTiyan

meri sehat ka raaz bas itna hai 'KHwah-maKHwah'

khata hun roz tanz-o-zarafat ki roTiyan