baaten karo

rāt-bhar iqrār kī bāteñ karo

sub.h-dam inkār kī bāteñ karo

uljhaneñ dil kī baḌhānī hoñ agar

gesū-e-ḳhamdār kī bāteñ karo

haiñ nigāheñ tiir aur abrū kamāñ

yaar bā-hathiyār kī bāteñ karo

mah-vasho itne bure bhī ham nahīñ

aao ham se pyaar kī bāteñ karo

sirf pahlī hī ke din ai dosto

saaz aur jhankār kī bāteñ karo

dūsrī ko bach ga.e paise agar

kūcha-o-bāzār kī bāteñ karo

das talak chilllar agar baaqī rahe

chaa.e par aḳhbār kī bāteñ karo

biis aur ikkīs ko ahbāb se

charḳh-e-nā-hanjār kī bāteñ karo

qarz-e-hasana le ke tum untīs tak

ghar ke kārobār kī bāteñ karo

tiis ko bāteñ karo iktīs kī

yā dil-e-bīmār kī bāteñ karo

āḳhirī din ḳhuub ġhusse meñ raho

hujjat-o-takrār kī bāteñ karo

phir usī shab sub.h kī ummīd meñ

mīThī mīThī pyaar kī bāteñ karo

tum se ye kis ne kahā thā 'ḳhvāh-maḳhvāh'

is tarah be-kār kī bāteñ karo

raat-bhar iqrar ki baaten karo

subh-dam inkar ki baaten karo

uljhanen dil ki baDhani hon agar

gesu-e-KHamdar ki baaten karo

hain nigahen tir aur abru kaman

yar ba-hathiyar ki baaten karo

mah-washo itne bure bhi hum nahin

aao hum se pyar ki baaten karo

sirf pahli hi ke din ai dosto

saz aur jhankar ki baaten karo

dusri ko bach gae paise agar

kucha-o-bazar ki baaten karo

das talak chilllar agar baqi rahe

chae par aKHbar ki baaten karo

bis aur ikkis ko ahbab se

charKH-e-na-hanjar ki baaten karo

qarz-e-hasana le ke tum untis tak

ghar ke karobar ki baaten karo

tis ko baaten karo iktis ki

ya dil-e-bimar ki baaten karo

aaKHiri din KHub ghusse mein raho

hujjat-o-takrar ki baaten karo

phir usi shab subh ki ummid mein

miThi miThi pyar ki baaten karo

tum se ye kis ne kaha tha 'KHwah-maKHwah'

is tarah be-kar ki baaten karo