shar ka ehsas ho ki KHair mile

shar kā ehsās ho ki ḳhair mile

ḳhud ko dekhūñ jo chashm-e-ġhair mile

mujh ko hāsil ho aisī bedārī

lamha lamha karūñ nigah-dārī

zāhirī haal se guzar jā.ūñ

tah meñ ehsās kī utar jā.ūñ

apne chehre ke saare ruḳh kholūñ

aa.ine kī tarah se sach bolūñ

sach na jab shakl apnī dikhlā.e

jhuuT jab sach ke ruup meñ aa.e

mere hāthoñ meñ ho mirā dāman

koī mujh sā na ho mirā dushman

sub.h se apnī ghaat meñ baiThūñ

jaal phailā ke raat meñ baiThūñ

nukta-chīñ apnā aisā ban jā.ūñ

apnī jhūTī ḳhudī ko jhuTlā.ūñ

nuur ko apne tīrgī samjhūñ

apnī nekī ko buz-dilī samjhūñ

zo'm hai ye jo pārsā.ī kā

ye bhī hiila hai ḳhud-numā.ī kā

rang jo 'ijz meñ surūr kā hai

'aks ye bhī mire ġhurūr kā hai

har bulandī meñ merī pastī hai

merā īsār ḳhud-parastī hai

yuuñ hī tajziyya-e-ḳhayāl karūñ

apne har haal par savāl karūñ

nafy-e-kāmil jab apnī zaat kī ho

koī sūrat mire sabāt kī ho

ai ḳhudā mujh ko vo basīrat de

aur basīrat ke saath himmat de

jo mirī diid se na sharmā.e

jo mujhe dekh kar na ghin khaa.e

jo farishta na devtā maane

jo mujhe sirf aadmī jaane

jo mirī hirs ko qanā'at ko

merī nekī mirī ḳhabāsat ko

merī nafrat mirī mohabbat ko

mere har jhuuT har sadāqat ko

pā-e-tahqīr se na Thukrā.e

merī miTTī pe rahm farmā.e

shar ka ehsas ho ki KHair mile

KHud ko dekhun jo chashm-e-ghair mile

mujh ko hasil ho aisi bedari

lamha lamha karun nigah-dari

zahiri haal se guzar jaun

tah mein ehsas ki utar jaun

apne chehre ke sare ruKH kholun

aaine ki tarah se sach bolun

sach na jab shakl apni dikhlae

jhuT jab sach ke rup mein aae

mere hathon mein ho mera daman

koi mujh sa na ho mera dushman

subh se apni ghat mein baiThun

jal phaila ke raat mein baiThun

nukta-chin apna aisa ban jaun

apni jhuTi KHudi ko jhuTlaun

nur ko apne tirgi samjhun

apni neki ko buz-dili samjhun

zo'm hai ye jo parsai ka

ye bhi hila hai KHud-numai ka

rang jo 'ijz mein surur ka hai

'aks ye bhi mere ghurur ka hai

har bulandi mein meri pasti hai

mera isar KHud-parasti hai

yun hi tajziyya-e-KHayal karun

apne har haal par sawal karun

nafy-e-kaamil jab apni zat ki ho

koi surat mere sabaat ki ho

ai KHuda mujh ko wo basirat de

aur basirat ke sath himmat de

jo meri did se na sharmae

jo mujhe dekh kar na ghin khae

jo farishta na dewta mane

jo mujhe sirf aadmi jaane

jo meri hirs ko qana'at ko

meri neki meri KHabasat ko

meri nafrat meri mohabbat ko

mere har jhuT har sadaqat ko

pa-e-tahqir se na Thukrae

meri miTTi pe rahm farmae