ziyaada kuchh nahin mar jaenge kisi din hum

ziyāda kuchh nahīñ mar jā.eñge kisī din ham

har ek shai se mukar jā.eñge kisī din ham

har ek jagah bhaTakte phireñge saarī 'umr

bil-āḳhir apne hī ghar jā.eñge kisī din ham

na dekh roz haqārat se is qadar ham ko

koī to kaam bhī kar jā.eñge kisī din ham

tumhārī raah meñ har chiiz to luTā Daalī

ye jism-o-jān bhī dhar jā.eñge kisī din ham

tamāshā lafz o bayāñ kā bhī kab talak 'māmūn'

ki jism-o-jāñ se utar jā.eñge kisī din ham

ziyaada kuchh nahin mar jaenge kisi din hum

har ek shai se mukar jaenge kisi din hum

har ek jagah bhaTakte phirenge sari 'umr

bil-aKHir apne hi ghar jaenge kisi din hum

na dekh roz haqarat se is qadar hum ko

koi to kaam bhi kar jaenge kisi din hum

tumhaari rah mein har chiz to luTa Dali

ye jism-o-jaan bhi dhar jaenge kisi din hum

tamasha lafz o bayan ka bhi kab talak 'mamun'

ki jism-o-jaan se utar jaenge kisi din hum