main to hun sirf qissa-KHwan is mein

maiñ to huuñ sirf qissa-ḳhvāñ is meñ

duniyā terī hai dāstān is meñ

chāhe koī bhī dil TaTolo tum

koī rahtā hai nīm-jāñ is meñ

kaT rahā hai shajar shajar ye chaman

kaisā ġhāfil hai bāġhbāñ is meñ

kabhī mahfil thī ġham-gusāroñ kī

aaj rahte haiñ bad-gumāñ is meñ

ḳhud jahāñ degā āñdhiyoñ ko ḳhabar

tum banāo to āshiyāñ is meñ

har ta'alluq hai naav kāġhaz kī

aur mohabbat hai bādbāñ is meñ

ghar banāo to ehtiyāt karo

rah na jaa.e faqat makāñ is meñ

the fasāne kī aañkh meñ aañsū

zikr aayā mirā jahāñ is meñ

mil ga.ī to guzār lī ham ne

yuuñ jiyā jaatā hai kahāñ is meñ

go ki sākit hai zindagī merī

dard rakkhā gayā ravāñ is meñ

shikva hai to hayāt se itnā

jā rahā huuñ maiñ rā.egāñ is meñ

ye zamāna hai aa.ina 'abrak'

DhūñDtā kyā hai ḳhūbiyāñ is meñ

main to hun sirf qissa-KHwan is mein

duniya teri hai dastan is mein

chahe koi bhi dil TaTolo tum

koi rahta hai nim-jaan is mein

kaT raha hai shajar shajar ye chaman

kaisa ghafil hai baghban is mein

kabhi mahfil thi gham-gusaron ki

aaj rahte hain bad-guman is mein

KHud jahan dega aandhiyon ko KHabar

tum banao to aashiyan is mein

har ta'alluq hai naw kaghaz ki

aur mohabbat hai baadban is mein

ghar banao to ehtiyat karo

rah na jae faqat makan is mein

the fasane ki aankh mein aansu

zikr aaya mera jahan is mein

mil gai to guzar li hum ne

yun jiya jata hai kahan is mein

go ki sakit hai zindagi meri

dard rakkha gaya rawan is mein

shikwa hai to hayat se itna

ja raha hun main raegan is mein

ye zamana hai aaina 'abrak'

DhunDta kya hai KHubiyan is mein