jab bhi jaanib-e-manzil hum qadam baDhate hain

jab bhī jānib-e-manzil ham qadam baḌhāte haiñ

hādsāt haT haT kar rāsta banāte haiñ

āshiyāñ bulandī par is liye banāte haiñ

fāsle kī zahmat se barq ko bachāte haiñ

apnī raah se patthar jab bhī ham haTāte haiñ

aañkh meñ ka.ī chehre ghuum ghuum jaate haiñ

jab pahuñch nahīñ saktī raushnī mazāroñ meñ

phir diye mazāroñ par log kyuuñ jalāte haiñ

vus'at-e-do-'ālam meñ jo samā nahīñ sakte

kis tarah ta'ajjub hai dil meñ vo samāte haiñ

dā'vā-e-anā kyā hai fikr kī bulandī hai

aur us bulandī ko paane vaale paate haiñ

maut-o-zindagī goyā shaġhl hai 'adīl' un kā

naqsh ik banāte haiñ naqsh ik miTāte haiñ

jab bhi jaanib-e-manzil hum qadam baDhate hain

hadsat haT haT kar rasta banate hain

aashiyan bulandi par is liye banate hain

fasle ki zahmat se barq ko bachate hain

apni rah se patthar jab bhi hum haTate hain

aankh mein kai chehre ghum ghum jate hain

jab pahunch nahin sakti raushni mazaron mein

phir diye mazaron par log kyun jalate hain

wus'at-e-do-'alam mein jo sama nahin sakte

kis tarah ta'ajjub hai dil mein wo samate hain

da'wa-e-ana kya hai fikr ki bulandi hai

aur us bulandi ko pane wale pate hain

maut-o-zindagi goya shaghl hai 'adil' un ka

naqsh ek banate hain naqsh ek miTate hain